თბილისის საქალაქო სასამართლოში ბოლო დროის ერთ-ერთი სასტიკ მკვლელობაში ბრალდებული ქალის სასამართლო მიმდინარეობს, სადაც მოსამართლემ პაპიძის სასჯელი უნდა განსაზღვროს.

მაგდა პაპიძე აცხადებს, რომ ის გამამტყუნებელ ვერდიქტს არ ელოდებოდა.

"მე თვითონ დავჯდები დენის სკამზე ისე, რომ გული არ ამიჩქარდება. და ვილოცებ მისთვის, ვინც ღილაკს ხელს დააჭერს"- თქვა ბრალდებულმა.

„დაკავების დღიდან ჩემი სიმართლისთვის ვიბრძვი, მაგრამ ამას ჩვენს ქვეყანაში და ჩვენს მენტალობაში ვერ მივაღწიე. ახლა წლებს უნდა ვებრძოლო, რომ საკუთარი ქმრისა და შვილის საფლავი ვნახო.

ჩემი ღმერთის წინააღმდეგ ვერ წავალ, ამიტომ ეს გააკეთოს სახელმწიფომ. მივმართავ პრეზიდენტს, გასცეს ბრძანება, რომ ცოცხალი არ დამტოვოს. არ მეგონა თუ გამამტყუნებელი ვერდიქტი იქნებოდა. იმ გონივრული კითხვებიდან გამომდინარე, რომელსაც ნაფიცი მსაჯულები სვამდნენ იმედი მქონდა, მაგრამ პირიქით მოხდა.

მე არ მაქვს პრეტენზია სიცოცხლის ან უვადო პატიმრობის. მე თვითონ დავჯდები დენის სკამზე ისე, რომ გული არ ამიჩქარდება. და ვილოცებ მისთვის, ვინც ღილაკს ხელს დააჭერს" - განაცხადა მაგდა პაპიძემ.

დღევანდელ სასამართლოზე პროკურატურა მაგდა პაპიძისთვის უვადო პატიმრობის შეფარდება მოითხოვა.

მოკლული ომარ ქაფიაშვილის დედა დარეჯან მინდიკაურიც პროკურატურის მსგავსად პაპიძისთვის უვადო პატიმრობას მისჯას ითხოვს.

”ადამიანმა რომელმაც 2 ადამიანი დახოცა, ის საზოგადოებისთვისაც საშიშია. ამ ადამიანმა საკუთარი შვილი სიცოცხლეს გამოასალმა, ამიტომ მოვითხოვ უვადო პატიმრობას” - თქვა მინდიკაურმა.

პროცესზე ადვოკატმა მარიკა ფხალაძემ ემოციური სიტყვა წარმოთქვა:

”გთხოვთ, გაითვალისწინოთ როგორი დედა იყო მაგდა. ფსიქიატრმა თქვა, რომ ის არის ადამიანი, რომელიც მუდმივად განიცდის სიყვარულის ნაკლებობას. მიეცეს საშუალება ბრალდებულს, რომ მივიდეს საკუთარი შვილის საფლავზე. მოვითხოვ ბრალდებულის სასჯელი განისაზღვროს მინიმუმით”- აღნიშნა ადვოკატმა.

ბოლო ინფორმაციით, საქმის მოსამართლე სათათბირო ოთახში უკვე გავიდა, რამოდენიმე წუთში ცნობილი გახდება გადაწყვეტილება, რამდენ წელს მოუსჯიან მკვლელობაში ბრალდებულს.