დავით კაკაბაძის დღემდე უცნობი ნამუშევარი - ლაშა ბაქრაძე საზოგადოებას თხოვნით მიმართავს

კულტურა - 18:01, 05 Jul, 2016

1737

თბილისის გიორგი ლეონიძის სახელობის ლიტერატურის მუზეუმის დირექტორი საზოგადოებას თხოვნით მიმართავს. ლაშა ბაქრაძის განცხადებით ლიტერატურის მუზეუმში მიტანილია დავით კაკაბაძის საზოგადოებისთვის დღემდე უცნობი ნამუშევარი, რომლის შესაძენად მუზეუმს 15 ათასი დოლარი სჭირდება. ბაქრაძე საზოგადოებისგან ფინანსურ მხარდაჭერას ითხოვს რათა მუზეუმმა შეძლოს ამ უმნიშვნელოვანესი ნახატის შეძენა:

„ქალბატონებო და ბატონებო,

ყველას მოგმართავთ უმორჩილესი თხოვნით - გვჭირდება სპონსორი ან სპონსორები. ლიტერატურის მუზეუმში მოიტანეს დავით კაკაბაძის საზოგადოებისთვის დღემდე უცნობი ნამუშევარი, რომელიც მხატვარმა ტერენტი გრანელს მიუძღვნა. ამაზე მეტყველებს დავით კაკაბაძის წარწერა: „ჭეშმარიტად დიდ პოეტს, ტერენტი გრანელს. იმედია, თქვენი თხოვნა შევასრულეთ. დ. კაკაბაძე. 29 წ.“

ტერენტი გრანელმა კი ორი წლის შემდეგ წააწერა: „მე ტერენტი გრანელი ვარ, ეს ჩემი სახეა. როგორც ცხოვრება მიჰყვება ტალღებს, ისე მიჰყვება ჩემი სული ზეცას. მე არ მინდა მიწაზე, მე მინდა ვიყო სხვაგან. მე რაღაც სხვა მინდა. ტერენტი გრანელი, 1931 წელი“.

ლიტერატურის მუზეუმის პირდაპირი მოვალეობაა ამ ნამუშევრის შეძენა.

სულ 15 ათასი დოლარი გვჭირდება.

იმედია, არსებობენ ადამიანები, რომლებსაც შეუძლიათ ფინანსური მხარდაჭერა, რომელთაც ესმით, რამდენად მნიშვნელოვანია ხელოვნებისა და ლიტერატურის ისტორიისთვის ასეთი უნიკალური ძეგლის სახელმწიფო მუზეუმში დაბინავება და საზოგადოებისთვის ხელმისაწვდომობა.

ხვალ, 12 საათიდან ყველას შეუძლია მუზეუმში იხილოს მხატვრობისა და ლიტერატურის დამაკავშირებელი ეს უიშვიათესი ნიმუში.“- წერს ლაშა ბაქრაძე.