„მათ კარგად იცოდნენ ვის უშვებდნენ ციხიდან“ - დავით დეფი სტამბოლის ტერაქტსა და ჩატაევის გათავისუფლებაზე

საზოგადოება - 12:12, 02 Jul, 2016

2080

„ამ სამარცხვინო საქციელის, ტერორისტული აქტის მთავარი ორგანიზატორის გათავისუფლება განა მათი ძალისხმევის შედეგი არაა?“- წერს დავით დეფი გოგიბედაშვილი და იუსტიციის მინისტრისა და სახალხო დამცველის კვლავ თანამდებობაზე ყოფნას აპროტესტებს.

,,ბევრ ჩვენგანს ალბათ არა, მაგრამ ასევე ბევრ ჩვენგანს დარწმუნებული ვარ კარგად აქვს გაცნობიერებული, თან მტკივნეულად და სევდიანადაც კი, რომ ჩვენი ქვეყნის მთავარი მტერი უმეცრებაა და ჰედონიზმი. ეს ორივე ერთად მართლა კატასტროფაა. მონურ, არათავისუფალ, წლობით თუ ათწლეულობით გაუნათლებულ გარემოში მყუდროდ ჩაბუდებამ, შედეგად სწორედ ეს, უმეცრებისა და ჰედონიზმის ნაზავი გამოიმუშავა.

ასევე გასაგებია და სუფთა ადამიანურად რომ ვთქვათ, ასევე ყველას გვესმის, რომ იუსტიციის მინისტრს თეა წულუკიანს და სახალხო დამცველს უჩა ნანუაშვილს სულაც არ სურდათ სტამბოლის აეროპორტის აფეთქება, მაგრამ სწორედ მათი დიდი მეცადინეობით არ მოხდა განა იმ ჩატაევის გაშვება? ამ სამარცხვინო საქციელის, ტერორისტული აქტის მთავარი ორგანიზატორის გათავისუფლება განა მათი ძალისხმევის შედეგი არაა?

ისინი თანამდებობიდან გადამდგარები არ უნდა იყვნენ?

უნდა იყვნენ ცხადია.

„ქართული ოცნება“ ვერა და ვერ პოულობს ელემენტარულ ახსნას რა მოხდა ან ახლა რა უნდა ქნან. ზუსტად ასევე ვერ იპოვნიან ისინი შვებას, ვერც ბარბარე რაფალიანცის წინაშე და ვერც სტამბოლში იმ ორმოცდა ერთი ადამიანისა და მათი ოჯახების წინაშე. აგერ მე და აგერ თქვენ. უმეცრებასა და ჰედონიზმს ადრე თუ გვიან ეშველება და საერთოდ ყველაფერს ეშველება, მაგრამ ღალატს არასდროს. მათ კარგად იცოდნენ ვის უშვებდნენ ციხიდან.