"მაქვს ინტერესი პროცესი მშვიდად წარვმართო და არ ვიყო გაღიზიანებული"

"მაქვს ინტერესი პროცესი მშვიდად წარვმართო და არ ვიყო გაღიზიანებული" - სასამართლოში მაგდა პაპიძეს კითხავენ

საზოგადოება - 13:25, 30 Jun, 2016

12859

მეუღლისა და შვილის მკვლელობაში ბრალდებული ქალის მაგდა პაპიძის სასამართლო პროცესი თბილისის საქალაქო სასამართლოში ბრალდებულის დაკითხვით განახლდა. ბოლო ინფორმაციით, ბოლო დროის ერთ-ერთი სასტიკი მკვლელობაში ბრალდებულის დაკითხვა დახურულ რეჟიმში მიმდინარეობს.

დაკითხვის დახურვის შუამდგომლობა ბრალდების მხარემ დააყენა, რაც მოსამართლე გაბრიჩიძემ დააკმაყოფილა.

როგორც ცნობილია პროკურატურა პაპიძეს პირადი ცხოვრებისა და ასევე იმ მტკიცებულებებს შესახებ დაუსვამს კითხვებს, რომელიც მხარეებმა დახურულ სასამართლო სხდომაზე გამოიკვლიეს.

ბრალდებულმა განაცხადა, რომ მას სურს პროცესის დახურვა, ვინაიდან არ სურს რაიმე კითხვა პასუხგაუცემელი დარჩეს.

"არ ვაპირებ უხერხულ კითხვებზე პასუხებისგან თავის არიდებას, თანახმა ვარ, რომ სხდომა დაიხუროს", - განაცხადა ბრალდებულმა.

პროკურორმა პროცესზე კიდევ ერთი შუამდგომლობა დააყენა, მან მოკლული ომარ ქაფიაშვილის დედის დარეჯან მინდიკაურის დასწრება მოითხოვა. რადგან პროკურორის თქმით, მინდიკაურის ინტერესია გაიგოს რეალურად რა მოხდა და რატომ მოუკლეს შვილი და შვილიშვილი.

აღსანიშნავია, რომ ბრალდებულს არ უნდოდა პროცესს მისი დედამთილი დასწრებოდა. "ჩემი მაზლის მხრიდან ჩემს მიმართ ისმოდა შეურაცხმყოფელი რეპლიკები და მეც ამიტომ ვპასუხობ მას, მაქვს ინტერესი პროცესი მშვიდად წარვმართო და არ ვიყო გაღიზიანებული"- თქვა ბრალდებულმა.

საბოლოო ჯამში მოსამართლემ პროკურორის შუამდგომლობა დააკმაყოფილა.

მოსამართლემ მხარეებს მოუწოდა, რომ დაკითვისას გაჟღერებული ინფორმაცია, პროცესის გარეთ არ გაახმაურონ.