სააკაშვილის საპრეზიდენტო ბიბლიოთეკაში გამოფენა - “კანონი და სამართლიანობა“ დღეს გაიხსნება

საზოგადოება - 11:13, 28 Jun, 2016

2169

დღეს 17.00 საათზე სააკაშვილის საპრეზიდენტო ბიბლიოთეკაში ბულგარეთის საგარეო საქმეთა სამინისტროს კულტურის სახელმწიფო ინსტიტუტი სააკაშვილის საპრეზიდენტო ბიბლიოთეკასთან თანამშრომლობით წარმოადგენს გამოფენას - “კანონი და სამართლიანობა“. გამოფენას გახსნიან ბულგარეთის კულტურის სახელმწიფო ინსტიტუტის დირექტორი, ქალბატონი ლუდმილა დიმიტროვა და სააკაშვილის საპრეზიდენტო ბიბლიოთეკის დირექტორი ნინო კალანდაძე.

„კანონი და სამართლიანობა“ არის თანამედროვე ხელოვნების გამოფენა, რომელზეც წარმოდგენილი იქნება არტისტული გრაფიკის, ფერწერის, ფოტოგრაფიის და ციფრული ფერწერის ტექნიკით შესრულებული პოსტერები.

ბულგარეთის ოთხი ცნობილი ხელოვანის - მილენა აბანოსის, პროფესორი ივან გრაზდოვის, პროფესორი ნიკოლაი მლადენოვის და პროფესორი გიორგი იანკოვის ნამუშევრები წარდგება აუდიტორიის წინაშე.

გამოფენის იდეა და მესიჯები განსაკუთრებით დროულია და ასახავს დინამიურ სოციალურ პროცესებს, რომელიც მიმდინარეობს არა მხოლოდ ბულგარეთში, არამედ ევროპის და მსოფლიოს სხვა ქვეყნებში.

სამართლიანობის და სამართლის ცნებების განსხვავებულობა და ზოგჯერ ამ პროცესების აღრევა დიდ გავლენას ახდენს კანონის უზენაესობაზე ახალგაზრდა დემორკატიებში.

ამ ბულგარულ-გერმანული პროექტის ფარგლებში მომზადებული ნამუშევრები პირველად გამოიფინა 2012 წელს პოცდამის სასამართლოში, და სოფიის გალერეებში. მოგიანებით ის ნაჩვენები იყო ტუნისის, დუსელდორფის, ბერლინის და მუნხენის სასამართლოს შენობებში.

გამოფენა ორგანიზებულია საქართველოში ბულგარეთის საელჩოს მიერ.