გაბზარული თავის ქალა და მოტეხილი ხელი- ნაცემი ქალის მდგომარეობა დასტაბილურდა, ყოფილმა ქმარმა ქვეყანა დატოვა

საზოგადოება - 10:25, 20 Jun, 2016

7506

ყოფილი ქმრისგან ნაცემი და დაჭრილი 27 წლის ქალის ნინა ტ-ს ჯანმრთელობის მდგომარეობა ამ დროისთვის სტაბილურია. მას თავზე და კიდურებზე ბასრი საგნით ჭრილობები აქვს მიყენებული, ტანზე კი ცემისგან დაჟეჟილობები აღენიშნება. დაზარალებულს გაბზარული აქვს თავის ქალა და მოტეხილი აქვს ხელი.
როგორც ბათუმის რეფერალური საავადმყოფოს ექიმმა, ნეიროქირურგმა რეზო ბათნიძემ ჟურნალისტებს განუცხადა, ამ დროსითვის კონსერვატიულ მკურნალობას განაგრძობენ. მკურნალი ექიმის განმარტებით, პაციენტის მდგომარეობა ამჟამად სტაბილურია.

„სასწრაფოს ექიმის გადმოცემით, ქალბატონი უგონო მდგომარეობაში სასაფლაოებზე ნახეს. შემოსვლისას მრავლობითი დაზიანებები აღენიშნებოდა როგორც თავზე, ასევე, კიდურებზე. თავის არეში მრავლობითი ჭრილობები ჰქონდა, რომელიც ქირურგიული წესით დამუშავდა. მას ჭრილობა აღენიშნებოდა მარცხენა სხივ-მაჯის არეში. პაციენტს გაეწია სამედიცინო დახმარება და გამოკვლევების დროს გამოვლინდა თხემის ძვლის ხაზოვანი მოტეხილობა, დაჟეჟოლობების უბნები თავის ტვინის და ტრავმულ სუბარაქნოიდული სისხლჩაქცევები“, - აღნიშნა რეზო ბათნიძემ.

შემთხვევა 10 ივნისს ბათუმთან ახლოს, ჩაისუბანში მოხდა. უგონო მდგომარეობაში მყოფი ქალი კი 11 ივნისს სასაფლაოზე აღმოაჩინეს.

საქმეზე გამოძიება განხრახ მკვლელობის მცდელობის მუხლით და ოჯახური ძალადობის მუხლით მიმდინარეობს. შინაგან საქმეთა სამინისტროს ინფორმაციით, ახალგაზრდა ქალის სასტიკად ცემაში ბრალდებულმა არკადი ტ-მ ქვეყანა სავარაუდოდ მომხდარიდან მალევე სარფის პუნქტიდან დატოვა.

ნინა ტ მისმა ყოფილმა ქმარმა 14 წლის ასაკში მოიტაცა. მას სამი მცირეწლოვანი შვილი ჰყავს 11, 8, 6 წლის . ქმარს ერთი წლის წინ გაშორდა და მშობლებთან ცხოვრობდა.