"ასეთი ქმარი, რომ მყავდეს მძინარეს გამოვჭრიდი ყელსო"- პაპიძის საქმეზე ქაფიაშვილის მეგობარი დაკითხეს

საზოგადოება - 17:16, 16 Jun, 2016

39417

თბილისის საქალაქო სასამართლოში ბოლო დროის ყველაზე სასტიკი მკვლელობის საქმის განხილვა მოწმეთა დაკითხვით გრძელდება.

მაგდა პაპიძის სასამართლო პროცესზე დაიკითხა მოკლული ომარ ქაფიაშვილის ბავშვობის მეგობარი, მარიამ მაზმიშვილი.

სხვა მოწმეების მსგავსად, მაზმიშვილიც პაპიძის დის, ლანა პაპიძის რეაქციაზე ამახვილებს ყუდარბას.

"პანაშვიდზე ლანა გვერდით მეჯდა და ყვებოდა, რომ მის დას მაგდას, ჰყავდა საყვარელი ოთო ბერძენიშვილი, ამბობდა, ბოლო დღეებში სულ ამაზე მელაპარაკებოდაო. ისიც თქვა, ომარს ჭორად გაუგია ეს ამბავი და მაგადასთვის უთქვამს, თუ ეს დაგიმტკიცე, იცოდე, რომ არ გაცოცხლებ და მაგდამ დაასწროო. ამას ყვებოდა ლანა, რომელიც ასევე ამბობდა, ბავშვიც არ დამიტოვა, თურმე ეს ჰქონია ჩაფიქრებული, ომარს უყვარდა მაგდა და ღალატს არ აპატიებდაო"- იხსენებს მოწმე.

დღევანდელ პროცესზე მაზმიშვილმა პაპიძესთან საუბარიც გაიხსენა:

"ჩემი და ომარის საერთო მეგობარ გოგოს, ჰქონდა პრობლემა ქმართან დაკავშირებით და ყვებოდა ამ დაძაბულ ურთიერთობაზე, რა დროსაც მაგდამ უთხრა ამ გოგოს, ასეთი ქმარი, რომ მყავდეს მძინარეს გამოვჭრიდი ყელსო, ბუნებრივია ამ სიტყვებისთვის მაშინ ყურადღება არ მიგვიქცევია, მაგრამ ვხედავთ, რომ მან მართლა მძინარე მოკლა ომარი".