"მეორედ რომ დარეკა გავიგონე სახელი ოთო, მაგდას ომარი არ უყვარდა"- პაპიძის ხმაურიანი პროცესი გრძელდება

საზოგადოება - 13:47, 15 Jun, 2016

32146

თბილისის საქალაქო სასამართლოში, სადაც ქმარ-შვილის განზრახ მკვლელობაში ბრალდებული ქალის პროცესი მიმდინარეობს ამ წუთებში მეზობელ მარიამ პატარქალაშვილს კითხავენ.
მოწმემ შემზარავი მკვლელობის ღამე გაიხსენა და აღნიშნა, რომ სასწრაფოს და სამართალდამცველების მოსვლის შემდეგ მაგდა პაპიძემ ტელეფონზე ორჯერ სცადა დარეკვა.

„ერთხელ რომ დარეკა თქვა - ამას სულ გათიშული როგორ უნდა ჰქონდეს ტელეფონიო. მეორედ რომ დარეკა გავიგონე სახელი ოთო, თუმცა მერე ცოტა მოშორებით გავიდა და საუბარი აღარ გამიგია" - განაცხადა პაპიძის მეზობელმა.

მარიამ პატარქალაშვილი აცხადებს, რომ 2015 წლის 19 დეკემბერს მაგდა პაპიძე მეზობელ ბიჭს სთხოვდა თორნიკე მანქანით აეყვანათ საავადმყოფოში, რადგან მას მართვის მოწმობა არ ჰქონდა. თუმცა პატარქალაშვილმა აქვე აღნიშნა, რომ მაგდა პაპიძე ხშირად იჯდა საჭესთან.
ამასთან როგორც მაგდა პაპიძის მეზობელმა სასამართლო პროცესზე განაცხადა, ბრალდებულს ომარ ქაფიაშვილთან დაქორწინებამდე სხვა მამაკაცთან ჰქონდა ურთიერთობა და ამის შესახებ ინფორმიერებული იყო ბრალდებულის დაც.
მისი თქმით, მაგდა პაპიძეს ქმარი არ უყვარდა.