ქუთაისში სტუდენტები გაქურდეს -ახალგაზრდები პოლიციას უმოქმედობაში ადანაშაულებენ

კრიმინალი - 12:13, 15 Jun, 2016

5381

ქუთაისში, ახვლედიანის ქუჩაზე აკაკი წერეთლის უნივერსიტეტის სტუდენტები გაქურდეს. როგორც "ნიუპოსტის" კორესპოდენტი იტყობინება შემთხვევა ორი კვირის წინ მოხდა.
როგორც დაზარალებულები განმარტავენ, საღამოს 10 საათისთვის სახლიდან გავიდნენ. რამდენიმე წუთის შემდეგ კი მეზობელმა ტელეფონით აცნობა, რომ მათ ბინასთან რამდენიმე საეჭვო ახალგაზრდა შეამჩნია.
სახლში დაბრუნებულ სტუდენტებს, ოთახიდან, პირადი და სამსახურებრივი ტექნიკა მოპარული დახვდათ.
"ჩემი საკუთარი ძვირადღირებული ლეპტოპი წაიღეს. გარდა ამისა, აღარაა 2 სამსახურის პლანშეტი და ციფრული კამერა. ასევე, ჩემს მეგობარსაც მოპარეს ციფრული ფოტოაპარატი. ზარალი დაახლოებით 2 500 ლარამდეა. ისე შეგვეშინდა, მეზობლებმა სასწრაფო დახმარებაც გამოიძახეს," - ამბობს დაზარალებული, ფატიმა კოკაია.
აკაკი წერეთლის უნივერსიტეტის სტუდენტები ახვლედიანის ქუჩაზე ნაქირავებ სახლში ცხოვრობენ. მათ მომხდარი ფაქტის შესახებ სამართალდამცავებს მაშინვე აცნობეს. თუცა, მათივე განცხადებით, პოლიციის მხრიდან რეაგირება ამ დრომდე არ არის.
"მხოლოდ იმას გვეუბნებიან, რომ გამოძიება მიმდინარეობს. ფაქტია, ამ ხნის მანძილზე არც ნივთები ჩანს და არც დამნაშავეები არიან დაკავებული," - აცხადებენ სტუდენტები და პოლიციას უმოქმედობაში ადანაშაულებენ.

როგორც "ნიუპოსტს" მომხდართან დაკავშირებით შს სამინისტროში განუცხადეს, მიმდინარეობს აქტიური საგამოძიებო მოქმედებები გამოძიება კი საქართველოს სსკ-ის 177-ე მუხლით მიმდინარეობს, რაც ქურდობას გულისხმობს.