აქცია მერიასთან - კომპენსაციების გარეშე დარჩენილი დაზარალებულები დახმარებას ითხოვენ

საზოგადოება - 10:49, 14 Jun, 2016

1767

13 ივნისის სტიქიის დროს დაზარალებული წყნეთის ხევის 2 ნომერში მცხოვრები ოჯახების ნაწილი თბილისის მერიასთან შიმშილობას გეგმავს.

მათი ნაწილი გუშინ ნარმანიას უწყებასთან შეიკრიბა და კომპენსაცია მოითხოვა.

აქციის მონაწილეების თქმით, მათ წყალდიდობის დროს საცხოვრებელი სახლები და ქონება დაკარგეს, ხელისუფლებამ კი, დაზარალებულის სტატუსიც არ მიანიჭა და შესაბამისად, კომპენსაციების გარეშე დატოვა.

მოქალაქეების თქმით, დახმარებების გარეშე ის ოჯახები დარჩნენ, რომლებსაც არ ჰქონდათ დაკანონებული ფართები ან ქირით ცხოვრობდნენ.

მერიისგან კომპენსაციის მიღებას ამ მისამართზე მცხოვრები 22 ოჯახი ბოლო ერთი წელია ითხოვს.

"ის ფართი სადაც მე ვიყავი მიტოვებული იყო, ჩემი სახსრებით ავაშენე, ჩემი სახსრებით ავაშენე თუ კი რამე მქონდა ყველაფერი წყალმა წაიღო, შემდეგ კი მერიიდან ასეთი პასუხი მომწერეს, რომ შენს საკუთრებაში არაფერი არ იყო და და ვერაფრით დაგეხმარებითო. სანამ ოფიციალურ პასუხს არ მივიღებ პირადად მერისგან აქ ვიქნები და მივმართავ პროტესტის უკიდურეს ფორმას - შიმშილობას"- აღნიშნა თეა კალუჟანმა, რომელიც აქციაზე ორ მცირეწლოვან ბავშვთან ერთად იმყოფებოდა.

მერიის ქონების მართვის სააგენტოს ხელმძღვანელის თქმით, ყველა ოჯახს აქვს შეთავაზება სულადობის მიხედვით მიიღოს კონპენსაცია.

"ეს დახმარება ყველა ოჯახამდე მივა"- თქვა კარლო ლაფერაძემ.