განათლების სისტემის რეფორმასთან დაკავშირებით დღეს სტუდენტურმა მოძრაობა „აუდიტორია 115-მა“ პრესკონფერენცია გამართა და აღნიშნულ საკითხთან მიმართებით არსებულ პრობლემებზე ისაუბრა:

“აუდიტორია 115”-ის წევრებს მიგვაჩნია, რომ საუნივერსიტეტო სივრცეში არსებულ პრობლემათაგან უმთავრესი და საბაზისო მნიშვნელობის განათლების ხარისხია. პრობლემის საფუძველი კი ის არის, რომ უნივერსიტეტი დღეს იმართება არა აკადემიური და სამეცნიერო ამოცანებით, დამოუკიდებელი, უმაღლესი დონის აკადემიური პერსონალის მიერ, არამედ - წინა ხელისუფლების პოლიტიკური მოტივაციით დაკომპლექტებული საბჭოების ინტერესებით. სწორედ ავტონომიის ცნებას ამოფარებული საბჭოების კლანურ მმართველობას მივიჩნევთ მთავარ დაბრკოლებად რეფორმის გზაზე.

მიზნის მიღწევის ერთადერთ გზად ჩვენ მივიჩნევთ “გარეშე რეფერირების” (Peer Review ) მექანიზმის შემოღებას რაც გულისხმობს უნივერსიტეტის პროფესურის, განსაკუთრებით უმაღლესი აკადემიური თანამდებობების პირთა შერჩევას საერთაშორისო რეფერირების წესით, თანასწორუფლებიან კოლეგათა მიუკერძოებელი ურთიერთშეფასების გზით და არა რომელიმე პრივილეგირებული ჯგუფის შეხედულების მიხედვით”, - აცხადებენ “აუდიტორი 115”-ის წევრები.