,,გაიყვანეთ ეს ბრბო“ - თსუ-ს თვითმმართველობა სახელმწიფო უწყებებს მიმართავს

საზოგადოება - 15:09, 27 May, 2016

2455

თბილისის სახელმწიფო უნივერსიტეტის სტუდენტური თვითმმართველობა სახელმწიფო უწყებებს წესრიგის აღდგენისკენ მოუწოდებს. თვითმმართველობის წარმომადგენლებმა დღეს, თსუ-ს მეორე კორპუსში გამართულ ბრიფინგზე ,,აუდიტორია 11“-ის წევრებს ბრბრო უწოდეს და მათი უნივერსიტეტიდან გაყვანა მოითხოვეს. თვითმმართველობის პრეზიდენტის მოვალეობის შემსრულებლის ბახვა კვირკაშვილის თქმით, შემდგომი მოვლენების განვითარებაზე პასუხისმგებლობა უნივერსიტეტის ადმინისტრაციას და ,,აუდიტორია 115“-ის წევრებს დაეკისრებათ.

„სტუდენტური თვითმმართველობა მიმართავს ყველა ორგანოს, უნივერსიტეტის ადმინისტრაციას, რომ აღდგეს ინსტიტუციური წესრიგი. აუცილებელია ამ ადამიანების გაყვანა მოხდეს არა მარტო სტუდენტური თვითმმართველობის ოთახებიდან, არამედ ”აუდიტორია 115”-იდან, რომელიც რატომღაც მისაკუთრებული და ოკუპირებული აქვთ. ჩვენ ვაძლევთ გონივრულ ვადას ყველა უწყებას, შიდა საუნივერსიტეტო, თუ სახელმწიფო უწყებებს, რომ უნივერსიტეტიდან ეს ბრბო გაიყვანონ. აღდგეს ინსტიტუციური წესრიგი და ჩვენ გავაგრძელოთ ჩვეულებრივი საქმიანობა. ამ ადამიანების ყოფნა უნივერსიტეტში არის ყოველთვის პროვოკაციების და სიტუაციის გამძაფრების მაპროვოცირებელი. მსგავსი ადამიანები უნივერსიტეტის ტერიტორიაზე არ უნდა იყვნენ“, - განაცხადა ბახვა კვირიკაშვილმა.

„აუდიტორია 115“-ის წევრებს თსუ-ში სამი აუდიტორია აქვთ დაკავებული, კერძოდ, დაკავებულია 213-ე აუდიტორია, 303-ე და ასევე აუდიტორია 115.