კონკურსის ვებ გვერდზე - www.madeinnyjazz.com საკონკურსო ვიდეოს ატვირთვა შესაძლებელია მსოფლიოს ნებისმიერი წერტილიდან, როგორც ინდივიდუალური შემსრულებლებისთვის, ასევე მუსიკალური ჯგუფებისთვის.

ყოველწლიურად ჟიურისა და მაყურებლების ხმების დაჯამების შედეგად ვლინდება სამი გამარჯვებული, რომელთაც ფულადი თუ სხვა ჯილდოების გარდა ეძლევათ უნიკალური შესაძლებლობა მონაწილეობა მიიღონ ნიუ იორკში, „თრაიბეკას“ საკონცერტო დარბაზში გამართულ ჯაზ გალა კონცერტში.

კონკურსის ჟიურიში არიან ყველაზე პრესტიჟული მუსიკალური ჯილდოს - „გრემის“ მფლობელი მუსიკოსები - ლენი ვაითი, მაიკ სთერნი, რენდი ბრეკერი. აღსანიშნავია, რომ კონკურსის კომიტეტიც მსოფლიოში სახელგანთქმული მუსიკოსებისგან შედგება. წელს Made In New York Jazz Competition-ის შემოქმედებით გუნდს საერთაშორისო სამხატვრო მრჩევლის (International Artistic Advisor) რანგში ცნობილი იტალიელი მომღერალი მარიო ბიონდი დაემატა.

მიმდინარე წელს ბრენდის Made In New York Jazz Competition ელჩი მსოფლიოში (Brand Ambassador) ქართველი პროდიუსერი თეა გრიგოლაშვილი გახდა. იგი ჟიურის საორგანოზაციო კომიტეტმა 21 მაისს, ნიუ იორკში გამართულ ჯაზ გალა კონცერტზე წარუდგინა დამსწრე საზოგადოებას. თეა გრიგოლაშვილი ბოლო რამოდენიმე წელია მოსკოვსა და ნიუ იორკში მოღვაწეობს. მას მუსიკალურ ბიზნესში მუშაობის 15 წლიანი გამოცდილება აქვს. დღესდღეისობით მისი საქმიანობის ერთ-ერთ მიმართულება სწორედ მსოფლიო მასშტაბით კონკურსის Made In New York Jazz Competition პოპულარიზაციაა.

თეა გრიგოლაშვილმა „ნიუპოსტთან საუბრისას აღნიშნავს: „როგორც ლუი არმსტრონგმა თქვა - „თუკი შენ იკითხე რა არის ჯაზი, ესეიგი ვერასდროს გაიგებ მას". ჩემი აზრით, ჯაზი რწმენაა და მას უდიდესი დიპლომატიური მისია აკისრია. იგი სხვადასხვა რელიგიის, ეთნოსის, ჟანრის მუსიკოსებს აერთიანებს. დღეს ციფრული ერაა, სოციალური ქსელები უსაზღვრო შესაძლებლობებს იძლევა, რაც თანამედროვე მუსიკალური რუქის კონტურებს უსაზღვროს ხდის.

ჩვენ, საქართველოში არაჩვეულებრივი ახალგაზრდა ჯაზ-მუსიკოსები გვყავს. იმედი მაქვს სულ მალე მათი სახელებიც მოინიშნება Made In New York Jazz Competition -ის რუქაზე. ეს კონკურსი შესანისნავ შანს აძლევს ახალგაზრდებს მომავალი შემოქმედებითი ზრდის, მსოფლიოში ცნობილ მუსიკოსებთან თანამშრომლობის თვალსაზრისით.

კონკურსს 7 კატეგორია აქვს. ვიდეოს ატვირთვა შეუძლიათ როგორც სოლო მომღერლებს, ასევე ბენდებს, კომპოზიტორებს, არანჟირების ავტორებს...

წელს კონკურსმა ახალი ლოკაციები დააანონსა. ეს იმას ნიშნავს, რომ ნიუ იორკის შემდეგ გალა კონცერტი Made In New York Jazz Festival-ის სახელით დაიწყებს სხვადასხვა ქვეყნებში მოგზაურობას.

მინდა კონკურსის მორიგი ლოკაცია საქართველო გახდეს და გალა კონცერტი თბილისშიც ჩატარდეს. საამისოდ უკვე მიმდინარეობს მოლაპარაკებები და იმედი მაქვს ამ კონკურსს საქართველოში ბევრი მხარდამჭერი გამოუჩნდება.

ვურჩევ ქართველ მუსიკოსებს გამოიყენონ შანსი და ატვირთონ თავიანთი ვიდეოები კონკურსის ვებ გვერდზე madeinnyjazz.com, რაც 2016 წლის 29 ოქტომბრამდე იქნება შესაძლებელი."