„ახლა ჩვენს ოჯახში ერთით მეტი საყვარელი ბავშვია... ირაკლის ყოველთვის უნდოდა მესამე შვილი“-ნათია ფანჯიკიძე (ფოტო)

საზოგადოება - 09:38, 27 May, 2016

29197

ირაკლი ალასანიას და ნათია ფანჯიკიძის ოჯახური ცხოვრება ახალ ეტაპზე გადავიდა.მათ ოჯახს ცოტა ხნის წინ ახალი წევრი შეემატა. მათი უფროსი შვილი, ნიკოლოზ ალასანია, დაქორწინდა, რომლის რჩეულიც ნუცა ადამიაა. ამის შესახებ, რა თქმა უნდა, ჟურნალისტებიც დაინტერესდნენ და არაერთ ინტერნეტ გამოცემაში გამოჩნდა ახალდაქორწინებულების ფოტოები და სხვადასხვა ინფრმაცია. ჟურნალ „სარკესთან“ ნათია ფანჯიკიძემ ისაუბრა, თუ როგორ გრძნობს თავს დედამთილის ამპლუაში და ზოგადად როგორია მისი ოჯახისთვის ეს სიახლე.

- ქალბატონო ნათია, თქვენი ოჯახის ცხოვრებაში ახალი და ძალიან ლამაზი ეტაპია. თქვენ და თქვენი ქმარი დედამთილ-მამამთილი გახდით, რა შეგრძნებით შეხვდით ამ სიახლეს?
- დედამთილობას ასე ვერ აღვიქვამ. ვმხიარულობ, რომ ახლა ჩვენს ოჯახში ერთით მეტი საყვარელი ბავშვია, თუმცა ბავშვიც აღარ ეთქმის, ნიკაც და ნუცაც სრულწლოვანები არიან, რძალი 19 წლისაა, ნიკუშა - 23-ის. ყველაზე მეტად ჩემი თავის ბებიის როლში წარმოდგენა მახარებს. ეს მაქვს ყველაზე კარგად დანახული და მოუთმენლად ველოდები, როდის ვითამაშებ პატარა ბარტყით.

- ბატონი ირაკლი როგორ შეხვდა ვაჟის დაქორწინებას?
- ძალიან დიდი სიხარულით. ის უფრო ვერ გავაცნობიერეთ, რომ ნიკუშა ცოლიანია ან ნუცა ჩვენი რძალია, მაგრამ სამაგიეროდ გავაცნობიერეთ, რომ გვეყოლება სათამაშო ბავშვი. ეს ორივესთვის, ირაკლისთვისაც და ჩემთვისაც, ძალიან დიდი სიხარულია. ღმერთმა ჯანმრთელი მოაბრძანოს ის ბავშვი! ვთვლი, რომ ირაკლი მართლა ძალიან კარგი მამაა დღესაც, საკმაოდ კარგად ესმის თავისი შვილების, ურთიერთობაში ძალიან ზომიერია. რაც შეეხება ბაბუობას, მე მგონია, რომ სიხარულისა და სიამოვნებისგან ჭკუიდან შეიშლება და თან ვფიქრობ, მან ეს დაიმსახურა! ირაკლის ყოველთვის უნდოდა მესამე შვილი, მაგრამ ჩვენს ცხოვრებაში კადრები იმდენად სწრაფად მონაცვლეობდა, სიტუაციები ისე იცვლებოდა, ხან აქ ვცხოვრობდით, ხან - სხვაგან, ხან ერთ ომში იყო, ხან - მეორეში და გამოვიდა ისე, რომ ორი შვილი გვყავს. მისი სურვილი დაგვიანებით სრულდება, სახლში პატარა ჩნდება, თანაც მისი გვარის!