ქსანი-სტეფანწმინდას ელგადამცემი ხაზის მესამე საჯარო განხილვა გაიმართა

საზოგადოება - 14:47, 23 May, 2016

1313

გარემოსა და ბუნებრივი რესურსების დაცვის სამინისტროს ორგანიზებით შპს „ენერგოტრანსის“ 500 კვ ძაბვიანი ქსანი-სტეფანწმინდას შემაერთებელი ელექტროგადამცემი ხაზის პროექტთან დაკავშირებით კიდევ ერთი საჯარო განხილვა გაიმართა. მესამე საჯარო განხილვა სამინისტროს ინიციატივით, დაინტერესებული საზოგადოების ჩართულობით ჩატარდა. შეხვედრას მინისტრის მოადგილე მაია ბითაძე ესწრებოდა. დაინტერესებულ მხარეებთან სს „საქართველოს სახელმწიფო ელექტროსისტემის“ წარმომადგენელებმა პროექტის მნიშვნელობაზე ისაუბრეს.

საქართველოს ეკონომიკისა და მდგრადი განვითარების სამინისტროს ტექნიკურ და სამშენებლო ზედამხედველობის სააგენტოს მიერ, მიმდინარე წლის 19 აპრილს, ეკოლოგიური ექსპერტიზის დასკვნის მიღების მიზნით, გარემოსა და ბუნებრივი რესურსების დაცვის სამინისტროში წარმოდგენილი იქნა შპს „ენერგოტრანსის“ 500 კვ ძაბვიანი ქსანი-სტეფანწმინდას შემაერთებელი ელექტროგადამცემი ხაზის გარემოზე ზემოქმედების შეფასების ანგარიში და სანებართვო დოკუმენტაცია. დოკუმენტაციის ეკოლოგიურ ექსპერტიზაზე წარმოდგენის შემდგომ, სამინისტროს შუამდგომლობით, საქართველოს ეკონომიკისა და მდგრადი განვითარების სამინისტროს ტექნიკურ და სამშენებლო ზედამხედველობის სააგენტოს მიერ მოხდა ადმინისტრაციული წარმოების ვადის გაზრდა მიმდინარე წლის 27 მაისამდე და ყველა დაინტერესებულ პირს მიეცა შესაძლებლობა გამოეთქვა შენიშვნები და მოსაზრებები.

საჯარო განხილვას დაინტერესებულ მხარეებთან ერთად, კომპანიის წარმომადგენლები ესწრებოდნენ.