"მთავარი პრობლემა შიმშილია" - მარტოხელა, 3 არასრულწლოვანის დედა შველას ითხოვს

საზოგადოება - 17:36, 19 May, 2016

2670

28 წლის მარტოხელა დედა, "ნიუპოსტს" გაუსაძლისი პირობების შესახებ უყვება და საზოგადოებას დახმარებას სთხოვს. ვერა გიორგაშვილი სოციალურად დაუცველთა კატეგორიას მიეკუთვნება, ოთხ სულიანი ოჯახის შემოსავალი სწორედ სოციალური დახმარებაა, რომელიც 420 ლარს შეადგენს.

ახალგაზრდა ქალი ქმარმა წლების წინ მიატოვა და მას შემდეგ 3 არასრულწლოვანთან ერთად, გორიდან თბილისში გადმოსახლდა.

ბოლო ერთი წელია გიორგაშვილი ავჭალაში, მანაგაძის 5 ნომერში მდებარე საერთო საცხოვრებელში დასახლდა, თუმცა არსებობისთვის საჭირო პირობები არ გააჩნია.

"4 ადამიანს ერთ ოთახში გვძინავს, არც სამზარეულო გვაქვს და სველი წერტილებიც საერთოა. სახურავი დაზიანებულია, წვიმის დროს ჩვენთანაც იმ ინტენსივობით წვიმს როგორც გარეთ, ვართ გაუსაძლის პირობებში, ძალიან მიჭირს ბავშვების გამოკვება, საკვები უფასო სასადილოდან ამომაქვს, თუმცა საჭმელს ცუდი სუნი აქვს. დღეს ბარკალი წამოვუღე თუმცა ყარდა"- გვითხრა ვერა გიორგაშვილმა.

მისი თქმით, შენობა სადაც ცხოვრობს ავარიულია, არსებობს საშიშროება, რომ აივანი ჩამოინგრეს. გიორგაშვილის ინფორმაციით, არაერთხელ მიმართა გამგეობას თუმცა უშედეგოდ.

"ხელისუფლებაზე მეტად, მოსახლეობა და კეთილი ადამიანები მეხმარებიან. დღეს საჭირო ავეჯის ნაწილი მომიტანეს, ახლა მთავარი საზრუნავი შიმშილის დამარცხებაა. საკვები პროდუქტები ძალიან გვჭირდება"- აცხადებს მარტოხელა დედა.

ვერა გიორგაშვილის თხოვნით, ვაქვეყნებთ ახალგაზრდა ქალის საკონტაქტო ნომერს: 557 635 420