„ვერც ისეთი „დუდუ“ ვარ, როგორც სერიალში“- სად ცხოვრობს მსახიობი საცხოვრებელი სახლის დაწვის შემდეგ

საზოგადოება - 12:25, 19 May, 2016

25369

მუსიკისა და დრამის თეატრის მსახიობი ალეკო ბეგალიშვილი ბოლო დროს ყველასთვის „დუდუსთან“ ასოცირდება. მიუხედავად იმისა, რომ 48 წლის მსახიობს არაერთი საინტერესო როლი აქვს შექმნილი სცენასა თუ ეკრანზე, სერიალი „ჩემი ცოლის დაქალები“ და „დუდუს“ გმირი მისთვის სავიზიტო ბარათი აღმოჩნდა. ჟურნალ „სარკესთან“ საუბარისას ცნობილი გახდა, რომ რამდენიმე დღის წინ მას სახლი დაეწვა და შედეგად მისი ოჯახი დიდი პრობლემის წინაშე აღმოჩნდა.

„ძველი გაყვანილობიდან ცეცხლი წამებში აალდა და სახლს მოედო. ჩვენს ზემოთ ვინც ცხოვრობს, ისინიც დაზარალდნენ. ამ დროს გადაღებაზე ვიყავი, შინ ჩემი ცოლი და შვილები იყვნენ. სამზარეულო, დერეფანი, ტექნიკა ყველაფერი დამწვარია. ფაქტობრივად, ქუჩაში ვარ. მხოლოდ საძინებლები გადარჩა. სახანძროდან უნდა მოვიტანო დასკვნა, გამგეობა დამპირდა, მოვალ და მივხედავო. საკუთარი სახსრებით შეუძლებელია, ამ სახლის აღდგენის შანსი არ არის. ხანძარი ღამით მოხდა, 11 მაისს. მეზობლებმა ჩააქრეს. მეზობლებმა დაიწყეს ჩაქრობა, სახანძროს ხომ არ დაელოდებოდნენ. იტალიურ ეზოში ვცხოვრობ, სარდაფები დატბორილია, ძალიან ავარიული ეზოა“-ამბობს ალეკო ბეგალიშვილი ჟურნალ „სარკესთან“ საუბრისას. ჟურნალისტის შეკითხვაზე ამჟამად სად ცხოვრობს მსახიობის ოჯახი, პასუხი ასეთია: „ისევ იმ სახლში ვარ და ამ პირობებში მიწევს ცხოვრება. რას ვიზამთ, ვერც ისეთი დუდუ ვარ, როგორც სერიალში“.