რატომ არ ჩატარდა ჯაბა ბოჯგუას დასახმარებლად დაანონსებული საქველმოქმედო კონცერტი

საზოგადოება - 15:08, 13 May, 2016

37578

არასამთავრობო ორგანიზაცია "ახალგაზრდული კონგრესი"-ის ორგანიზებით 12 მაისს ფილარმონიის დიდ საკონცერტო დარბაზში მომღერალ ჯაბა ბოჯგუას საქველმოქმედო კონცერტი უნდა გამართულიყო, რომელშიც მონაწილეობა ქართული შოუ-ბიზნესის არაერთ წარმომადგენელს უნდა მიეღო. მიუხედავად სურვილისა და მონდომებისა, კონცერტი არ შედგა. მიზეზის გასაგებად „ნიუპოსტი“, არასამთავრობო ორგანიზაცია "ახალგაზრდული კონგრესი"-ის ხელმძღვანელს, რატი რატიანს დაუკავშირდა.

„მიუხედავად თბილისის მერიისა და მომღერლების დიდი მხარდაჭერისა, ასევე საზოგადოების დიდი გამოხმაურებისა როგორიც ინტერნეტ სივრცეში იყო, პრობლემა ის არის, რომ ბილეთები არ გაიყიდა. სამწუხაროდ ხალხი არ დაინტერესდა ამ საქველმოქმედო კონცერტით, რომელიც ჯაბა ბოჯგუას დასახმარებლად კეთდებოდა.

თვენახევრის განმავლობაში ვის არარ მივაწვდინეთ ხმა, ყველამ იცოდა ამ კონცერტის შესახებ, თუმცა მხოლოდ 100 ბილეთამდე გაიყიდა. ფილარმონიის იჯარას თბილისის მერია იხდიდა. ბატონი დავით ნარმანია ძალიან შეწუხდა როცა გაიგო იმის შესახებ, რომ კონცერტი ვერ გაიმართებოდა. თუმცა ჩვენ რაღაც პერიოდის შემდეგ აუცილებლად გადავაკეთებთ ამ კონცერტს და აუცილებლად დავეხმარებით ჯაბა ბოჯგუას. ეს პირადად ჩემი დიდი სურვილიც არის. რაც შეეხება უკვე გაყიდულ ბილეთებს, კუთვნილი თანხა აუცილებლად უკან დაუბრუნდებათ“.

შეგახსენებთ რომ ჯაბა ბოჯგუა უკვე 8 წელია ლოგინს არის მიჯაჭვული. უკიდურესი გაჭირვების გამო კი მას და მის ოჯახს გაუსაძლის პირობებში უწევთ ცხოვრება. კონცერტის მიზანი იყო, შემოსული თანხით დახმარებოდა ბოჯგუას ოჯახს, თუმცა როგორც უკვე გითხარით კონცერტი სამწუხაროდ ვერ შედგა.