როგორია "კომედი შოუს" მსახიობის ჯანმრთელობის მდგომარეობა

როგორია "კომედი შოუს" მსახიობის ჯანმრთელობის მდგომარეობა - უახლესი ინფორმაცია კლინიკიდან

საზოგადოება - 13:28, 10 May, 2016

29234

"კომედი შოუს" მსახიობის გიორგი გოცირიძის ჯანმრთელობის მდგომარეობა გაუმჯობესდა. როგორც "ნიუპოსტს" 27 წლის მსახიობის მეგობრებმა განუცხადეს, გიორგის სიცოცხლეს საფრთხე არ ემუქრება.

ჩვენ, გოცირიძის ჯანმრთელობის მდგომარეობის გასარკვევად ერისთავის სახელობის ქირურგიის ეროვნულ ცენტრს დავუკავშირდით.

როგორც კლინიკის პრესსამსახურში აღნიშნეს, მსახიობი კრიტიკული მედიცინის დეპარტამენტში იმყოფება, თუმცა მოხსნილია აპარატული სუნთქვის რეჟიმიდან.

"კ.ერისთავის სახ. ქირურგიის ეროვნულ ცენტრში ავარიის შედეგად მოხვედრილ პაციენტს ჩაუტარდა ორი ურთულესი ოპერაცია მუცლის ღრუს ორგანოებზე, რომელიც ქირურგმა შოთა ძაგანიამ გააკეთა. ოპერაციამ წარმატებით ჩაიარა, პაციენტი მოხსნილია აპარატული სუნთქვის რეჟიმიდან. არის კონტაქტური და ადეკვატური, მდგომარეობა რჩება საყურადღებო, იმყოფება კრიტიკული მედიცინის დეპარტამენტში კვლავ ესაჭიროება მრავალკომპონენტიანი სამკურნალო ღონისძიებების ჩატარება"- აღნიშნეს კლინიკაში.

შეგახსენებთ, „კომედი შოუს“ მსახიობს გიორგი გოცირიძეს 27 აპრილს, გვიან ღამით, ბელიაშვილის ქუჩაზე, ფეხით გადაადგილებისას მსუბუქი მანქანა დაეჯახა.

პაციენტი კლინიკაში შოკურ მდგომარეობაში, გულ-მკერდისა, მუცლის ღრუს დახურული ტრავმებით და ორივე კიდურის მძიმე დაზიანებით მოათავსეს.

მსახიობს წვივისა და ძვლების მოტეხილობა აღენიშნებოდა. გოცირიძე მთელი ამ ხნის განმავლობაში მართვით სუნთქვაზე იმყოფებოდა.

კლინიკის ინფორმაციით, წვივებზე ურთულესი ტრავმატოლოგიური ორი ოპერაცია ტრავმატოლოგ ზურა ორაგველიძის მიერ ჩატრდა .

როგორც შს სამინისტროში "ნიუპოსტს" განუცხადეს, გამოძიება სისხლის სამართლის კოდექსის 276-ე მუხლის პირველი ნაწილით მიმდინარეობს, რაც სატრანსპორტო საშუალების ექსპლუატაციის წესის დარღვევას გულისხმობს, რამაც ჯანმრთელობის ნაკლებად მძიმე დაზიანება გამოიწვია.

დავით ჯაბაშვილი