გაღატაკებული და იმედდაკარგული ხალხი გორის მუნიციპალიტეტში

საზოგადოება - 16:00, 07 May, 2016

5967

გორის მუნიციპალიტეტში, ამ დროისთვის არსებული ინფორმაციით სტიქიამ დაახლოებით 7000 ჰა ფართობის სასოფლო-სამეურნეო კულტურები დააზარალა. აქედან, 5000 ჰექტრამდე მრავალწლიანი ნარგავები ძლიერად დაზიანდა. სეტყვამ ათობით სოფელს ბოლო ორ დღეში ორჯერ გადაუარა. როგორც მოსახლეობა ,,ნიუპოსტთან" ამბობს, თუ ხელისუფლება არ დაეხმარებათ წელს უკიდურეს გაჭირვებაში მოუწევთ ცხოვრება.
სეტყვისგან დაზარალებული სოფლები საქართველოს სოფლის მეურნეობის სამინისტროსა და ადგილობრივი ხელისუფლების წარმომადგენლებმა დაათვალიერეს. არცევსა და ქვეშში იმყოფებოდნენ სოფლის მეურნეობის მინისტრის მოადგილე - გოჩა ცოფურაშვილი, ამავე სამინისტროს რეგიონებთან კოორდინაციის უფროსი - შალვა კერესელიძე, გორის მუნიციპალიტეტის გამგებლის მოადგილე - ალექსი ვეშაპური, სოფლის მეურნეობის სამინისტროს შიდა ქართლის რეგიონული სამმართველოს უფროსი - მამუკა ლომსაძე და შიდა ქართლის გუბერნატორის მოადგილე - ამირან შავშიშვილი. მათ დაზიანებული ხეხილის ბაღები პირადად მოინახულეს და ადგილობრივ მოსახლეობას გაესაუბრნენ. ხელისუფლების წარმომადგენლები ამბობენ, რომ ზარალის ანაზღაურებასთან დაკავშირებით, ამჟამად მიმდინარეობს კონსულტაციები ადგილობრივ და ცენტრალურ ხელისუფლებას შორის.