კაიაკინგის საერთაშორისო ფესტივალმა სტარტი ქალაქ ოზურგეთიდან აიღო

საზოგადოება - 13:03, 06 May, 2016

2643

ამ წუთებში ქალაქ ოზურგეთის თეატრალურ მოედანზე კაიაკინგის პირველი საერთაშორისო ფესტივალი - "BZHUZHA RACE" ოფიციალურად გაიხსნა.

ქალაქ ოზურგეთში 11 ქვეყნის - საქართველოს, ბელგიის, საფრანგეთის, ნორვეგიის, ინგლისის, ესტონეთის, სლოვენიის, პოლონეთის, ლატვიის, რუსეთისა და უკრაინის კაიაკერები იმყოფებიან, რომლებიც სოფელ შემოქმედში, გომში მდინარე ბჟუჟზე სპორტის ამ სახეობაში პირველ საერთაშორისო ტურნირს გამართავენ.

მასშტაბური სპორტული ღონისძიება ექსტრემალური კაიაკინგის საერთაშორისო ჩემპიონატი-"BZHUZHA RACE" გურიის სამხარეო ადმინისტრაციის ორგანიზებით ტარდება.

საერთაშორისო ფესტივალი ქალაქ ოზურგეთის მერმა, ბეგლარ სიორიძემ გახსნა, რომელმაც მონაწილეებს და შეკრებილ საზოგადოებას სიტყვით მიმართა.

“ქალბატონებო, ბატონებო, ძვირფასო სტუმრებო მოგესალმებით! მივესალმები კაიაკინგის პირველ საერთაშორისო ფესტივალს ოზურგეთში და ამავდროულად გამოვხატავ ჩემს განსაკუთრებულ პატივისცემას თითოეული ჩამობრძანებული სტუმრის მიმართ. მიუხედავად იმისა, რომ ქალაქ ოზურგეთს ფოლკლორის ქალაქის სტატუსი აქვს, ჩვენთვის სპორტული ცხოვრება ნამდვილად მნიშვნელოვანი, აქტუალურია და არაერთ სიახლეს ვულოცავთ გზას. სწორედ ამიტომ, არავისთვის არის გასაკვირი, რომ დღეს, სწორედ ჩვენი ქალაქიდან სტარტს იღებს საინტერესო სიახლე, რასაც ექსტრემალური სპორტის თანამედროვე მიმართულების - კაიაკინგის საერთაშორისო ფესტივალი ქვია.

მინდა მადლობა გადავუხადო იმ ადამიანებს, რომელთა ძალისხმევითაც შესაძლებელი გახდა მდინარე ბჟუჟზე ამ საინტერესო ასპარეზობის ჩატარება. სპორტსმენებს წარმატებებს და სპორტულ იღბალს ვუსურვებ “ - განაცხადა ბეგლარ სიორიძემ.

საერთაშორისო ფესტივალის სააღლუმო მსვლელობა ქალაქ ოზურგეთის თეატრალური მოედნიდან დაიწყო, რომელიც ფლეშ-მობით დასრულდა.

კაიკინგის საერთაშორისო ტურნირი ხვალ დასრულდება და გამარჯვებული გამოვლინდება.