ბოტანიკური ბაღის დასაცავად საპროტესტო აქციების ტალღა 7 მაისიდან დაიწყება

საზოგადოება - 14:03, 03 May, 2016

3036

25 არასამთავრობო ორგანიზაციისგან შემდგარი საზოგადოებრივი გაერთიანება "ერთად" ბოტანიკური ბაღის დასაცავად შაბათს, 13:00 საათზე საპროტესტო აქციას გამართავს.

არასამთავრობო ორგანიზაციები თბილისის ბოტანიკური ბაღის ტერიტორიის გასხვისებას, ასევე შინდისი-კრწანისის დამაკავშირებელი გზის მშენებლობის შეწყვეტას და ტერიტორიის აუქციონზე გატანას აპროტესტებენ.

არასამთავრობოებს პარალელურად შეაქვთ განცხადებები თბილისის საკრებულოში და პარლამენტში. ისინი ამ საკითხზე მსჯელობის დაწყებას მოითხოვენ.

"თბილისის ჰამქარის" ხელმძღვანელის ცირა ელისაშვილის განაცხადებით, დღეს საქართველოს პარლამენტსა და საკრებულოში შევა მიმართვა, რათა აღნიშნული სახელმწიფო უწყებები დაინტერესდნენ ქალაქის ეკოლოგიური პრობლემებით და ბოტანიკური ბაღის საკითხი განხილული იყოს სხდომებზე საზოგადოების ჩართულობის ფონზე.

"ჩვენ ვითხოვთ, რომ საკითხები პარლამენტის და საკრებულოს დონეზე იქნეს განხილული საზოგადოებრივი ჩართულობის ფონზე. ორგანიზაციები ჩართულები იყვნენ, როგორც მხარე. ამით საშუალება გვექნება დავასაბუთოთ ჩვენი მოსაზრებები, თუ რა კონტექსტში დაირღვა კანონი როგორც კულტურული მემკვიდრეობის შესახებ" განაცხადა ცირა ელისაშვილმა.

არასამთავრობო ორგანიზაციების დღევანდელ პრესკონფერენციას ესწრებოდა საკრებულოს დამოუკიდებელ დეპუტატი ალეკო ელისაშვილი. ელისაშვილი დედაქალაქის მერს, დავით ნარმანიას მოუწოდებს, საკრებულოში მივიდეს და საკითხით დაინტერესდეს.
"ორი კვირაა ნარმანია იმალება და მხოლოდ პრესსამსახური აკეთებს განცხადებებს. დავით ნარმანიას ამ მტკივნეულ საკითხზე სიტყვა არ უთქვამს. მე ძალისხმევას არ დავაკლებ, რომ თბილისის საკრებულოში მოეწყოს საზოგადოებრივი განხილვა და სხდომას თბილისის მერი დაესწროს“, - განაცხადა ელისაშვილმა.