საქართველოში მოსახლეობის რიცხოვნობამ 3 713 804 კაცი შეადგინა- 2014 წლის აღწერის შედეგები

საზოგადოება - 14:03, 28 Apr, 2016

5126

2014 წლის საყოველთაო აღწერის საბოლოო მონაცემებით, საქართველოში მოსახლეობის რიცხოვნობამ 3 713 804 კაცი შეადგინა.

როგორც დღეს გამართული შედეგების პრეზენტაციაზე ითქვა, ეს მაჩვენებლი 2002 წლის აღწერის შედეგთან ( 4 371 535) შედარებით, 15 პროცენტით ( 657 731 კაცი) ნაკლებია. ამასთან, 2014 წლის აღწერის შედეგების მიხედვით, ქალაქის მოსახლეობამ შეადგინა 2 122 623 კაცი, ხოლო სოფლის მოსახლეობამ 1 591 181 კაცი.

ამასთან, შემცირება ძირითადად, სოფლის მოსახლეობაზე მოდის - სასოფლო დასახლებებში მოსახლეობის კლებამ 23,7 პროცენტი, ხოლო ქალაქის მოსახლეობის კლებამ 7,1 შეადგინა. წინა აღწერებთან შედარებით, მნიშვნელოვნად შეიცვალა ქალაქისა და სოფლის სტრუქტურაც: ქალაქის მოსახლეობის წილი მთლიან მოსახლეობაში 4,9 პროცენტული პუნქტით გაიზარდა და 57,2 პროცენტს გაუტოლდა.

საქართველოს რეგიონებში მოსახლეობის რიცხოვნობა, 2002 წელთან შედარებით, ყველაზე მეტად რაჭა-ლეჩხუმსა და ქვემო სვანეთში შემცირდა.

სტატისტიკის ეროვნული სამსახურის ინფორმაციით, რაჭა-ლეჩხუმსა და ქვემო სვანეთში მოსახლეობის რიცხოვნობა 37,4 პროცენტით, სამეგრელო-ზემო სვანეთის რეგიონში 29,0 პროცენტით შემცირდა, ხოლო ყველაზე ნაკლები შემცირება 10,6% პროცენტი აჭარაში დაფიქსირდა.

გარდა ამისა, 2014 წლის საყოველთაო აღწერის შედეგების მიხედვით, თბილისის მოსახლეობამ 1 108 717 კაცი შეადგინა, რაც წინა აღწერასთან შედარებით 2,5 პროცენტით მეტია.