ქალაქ ოზურგეთის მუნიციპალიტეტის ე.წ უსახლკაროთა თავშესაფარში ა.ა.(ი).პ. ქალაქ ოზურგეთის მუნიციპალიტეტის ცენტრალური ბიბლიოთეკის ფილიალი გაიხსნა.

ბიბლიოთეკის გახსნას ქალაქ ოზურგეთის მერი ბეგლარ სიორიძე ესწრებოდა.

თავშესაფარში ბიბლიოთეკის გახსნის იდეა ცენტრალური ბიბლიოთეკის ხელმძღვანელს ლიკა ბაქანიძეს ეკუთვნის.

ამ დროისათვის ფილიალს ხუთასამდე წიგნი გადაეცა, მათ შორის კლასიკური ჟანრის ლიტერატურა. ბიბლიოთეკა ასევე კომპიუტერული ტექნიკით აღიჭურვა. უახლოეს პერიოდში კი თავშესაფრის მობინადრეები wi-fi-ის უფასო ქსელით ისარგებლებენ.

“თავშესაფარში ბიბლიოთეკის ფილიალის გახსნის იდეა მერს შევთავაზე. პროექტი შეთავაზებიდან მალევე განხორციელდა. მინდა ავღნიშნო, რომ უკვე ორმოცი წელია რაც ბიბლიოთეკის დირექტორი ვარ და ამ წლების მანძილზე ფილიალის გახსნა პირველად გახდა შესაძლებელი“ - აღნიშნა ა.ა.(ი).პ. ქალაქ ოზურგეთის მუნიციპალიტეტის ცენტრალური ბიბლიოთეკის ხელმძღვანელმა ლიკა ბაქანიძემ.

,,მოხარული ვარ, რომ ჩვენს ბენეფიციარებს უკვე ბიბლიოთეკით სარგებლობის საშუალებაც ეძლევათ, წიგნების რაოდენობა გაიზრდება და ვფიქრობ, რომ აქ მცხოვრებ ნებისმიერ ადამიანს მისთვის საინტერესო წიგნის მოძიების საშუალება მიეცემა. კულტურის სამინისტროს წარმომადგენელს უკვე ვესაუბრეთ და მალე ბიბლიოთეკა თანამედროვე ლიტერატურითაც შეივსება. ქალაქის მერია თავშესაფრის მობინადრეებზე ზრუნვას და თანადგომას აქტიურად აგრძელებს. “- განაცხადა ქალაქის მერმა ბეგლარ სიორიძემ.