თბილისის სააპელაციო სასამართლოში, სადაც რუსთავი 2-ის საქმის განხილვა მიმიდნარეობს, არასამთავრობო სექტორის წარმომადგენლებიც იმყოფებიან. მედიასთან კომენტარი გააკეთეს თამარ კინწურაშვილმა და სალომე სამადაშვილმა.

„პროცესზე რუსთავი 2-ის მხარემ დააყენა მოსამართლე ნათია გუჯაბიძის აცილება, იმ წინასწარი განცხადებების გამო, რომელიც მოსამართლეთა ერთობის წევრმა გააკეთა ურთმელიძესთან დაკავშირებით, კერძოდ, შეაფასა ეს რუსთავი 2-ის მხრიდან გამოხატვის თავისუფლების სტანდარტის დარღვევად, რაც ბუნებრივია, ბადებს ეჭვებს მის მიკერძოებულობასთან დაკავშირებით. საეჭვოა ისიც, რომ მოსამართლეთა ერთობას არ გაუკეთებია არცერთი განცხადება იუსტიციის მინისტრის მხრიდან გაკეთებულ კომენტარზე, როდესაც ის სასამართლოს ამ საქმის დაჩქარებული წესით განხილვისკენ მოუწოდებდა. როდესაც სასამართლო ხელისუფლების მხრიდან არ აღიქვამს მედია ზეწოლას და ერთ ერთი მხარის შეფასებებს აფასებს გამოხატვის სტანდარტის დარღვევად, ეს ბუნებრივია ბადებს ეჭვებს. იმედს გამოვთქვამ, რომ მოსამართლეები გააცნობიერებენ იმას, რომ საქმე არ ეხება უბრალო საკითხს და ეხება ქვეყნის დემოკრატიული განვითარებისთვის მნიშვნელოვან საკითხს, რადგან წინასაარჩევნოდ პლურალისტური გარემოს შენარჩუნება თუ გვსურს, რუსთავი 2-ის სარედაქციო პოლიტიკა არ უნდა შეიცვალოს“, - განაცხადა თამარ კინწურაშვილმა.

მედიასთან აღნიშნულ თემაზე ისაუბრა დიპლომატთა კლუბის წევრმა, სალომე სამადაშვილმაც. მისი თქმით რუსთავი 2-ის წინააღმდეგ დაწყებული პროცესები უარყოფითად აისახება ქვეყნის ერვროპულ სტრუქტურებთან დაახლოებაზე:

„ჩვენ ვნახეთ, რომ საერთაშორისო თანამეგობრობამ და ევროკავშირმა ხელისუფლება არაერთხელ გააფრთხილა იმის შესახებ, რომ ნებისმიერი მცდელობა მათი მხრიდან, ჩაერიონ თავისუფალი მედიის დამოუკიდებლობაში და კერძოდ, მფლობელის შეცვლის გზით შეცვალონ რუსთავი 2-ის სარედაქციო პოლიტიკა, იქნება ძალიან მძიმე შედეგების მომტანი. საქართველოსა და ევროავშირს შორის მიმდინარე ურთიერთობებისთვის. სრული პასუხისმგებლობით შემიძლია განვაცხადო, რომ დღეს ფრონტის ხაზი საქართველოს დასავლური მომავლის თვალსაზრისით გადის სწორედ რუსთავი 2-ზე. თუ ხელისუფლება ხელს არ აიღებს მცდელობაზე შეცვალოს ამ არხის მფლობელები, ეს სავალალო შედეგებით დასრულდება, საქართველოსა და ევროკავშირს შორის უვიზო მიმოსვლის პერსპექტივის თვალსაზრისით და ჩვენ დავკარგავთ შანსს მივიღოთ ძალიან მნიშვნელოვანი მონაპოვარი, რისთვისაც დიდი ხანია ვიღწვით“, - აღნიშნა სალომე სამადაშვილმა.

მისი თქმით რუსთავი 2-ის თემა ყველა კონტექსტში წამოიჭრა, მათ შორის პრემიერის ვაშინგტონსა და ბრიუსელში ვიზიტისას.