ლევან გვაზავას სასამართლომ 10 ათას ლარიანი გირაო შეუფარდა

კრიმინალი - 15:48, 22 Apr, 2016

3468

შინაგან საქმეთა მინისტრის ყოფილ მოადგილეს ლევან გვაზავას სასამართლომ 10 ათას ლარიანი გირაო შეუფარდა. შეგახსენებთ, რომ საქმე ეხება ოქროყანაში შარშან 28 აგვისტოს მომხდარ შემთხვევას, როდესაც გვაზავას ნათესავი რევაზ კალომლეწავი გარდაიცვალა, გვაზავამ კი თვითმკვლელობა სცადა. დღევანდელ პროცესზე ბრალდების მხარე 20 ათას ლარიან გირაოს ითხოვდა და როგორც პროკურორი აცხადებდა, არსებობდა ლევან გვაზავას მხრიდან საქმის მოწმეებზე ზეწოლის ალბათობაც თუმცა, სასამართლომ გადაწყვიტა 10 ათას ლარიანი გირაოს შეფარდება.

გვაზავამ კომენტარი სხდომის დაწყებამდე გააკეთა. მისი თქმით, მომხდარი ფაქტი მისი და მისი ოჯახის ტრაგედიაა და მისთვის არ აქვს მნიშვნელობა თუ რა ბრალს წაუყენებს მას პროკურატურა და რა გადაწყვეტილებას გამოიტანს სასამართლო.
„არ ვიცი ასე უცბად რატომ გადაწყვიტეს, თუ სურთ ამის გამოყენება, ეს უკვე მარტო ჩემი არა, მათი ტრაგედიაც არის, რომ სხვისი უბედურება რაღაცაზე გამოიყენონ, ეს მომენტი არ არის ჩემთვის მნიშვნელოვანი“ - განაცხადა შს მინისტრის ყოფილმა მოადგილემ.

წინასასამართლო სხდომა გვაზავას საქმესთან დაკავშირებით მოსამართლემ 2ივნისს ჩანიშნა. დაცვის მხარე მიღებულ გადაწყვეტილებას არ ეთანხმება და შესაძლოა ის გაასაჩივროს.