ფონიჭალაში მომხდარი თავდასხმისას დაჭრილი მამაკაცის მდგომარეობა სტაბილურია

კრიმინალი - 16:49, 14 Apr, 2016

2179

გუშინ ქვემო ფონიჭალაში მომხდარი თავდასხმისას დაჭრილი 47 წლის მამაკაცის მდგომარეობა ამჟამად სტაბილურია.

როგორც მორიგე ექიმი ბესარიონ რევაზიშვილი აცხადებს პაციენტისთვის მიყენებული დაზიანებები სიცოცხლისთვის საშიში არ არის.
„არის რბილი ქსოვილების დაზიანება კიდურის მიდამოში, გულ-მკერდის მიდამოში თუმცა, ეს ჯერ მხოლოდ რბილი ქსოვილების დაზიანების ნიშნებია. სასიცოცხლო მნიშვნელობის ორგანოების დაზიანება არ ვლინდება. მისი ზოგადი მდგომარეობა ამჟამად სტაბილურია. იმყოფება მონიტორინგის ქვეშ “- განაცახადა ექიმმა.
დაზარალებულის ძმა კი აცხადებს, რომ დაზარალებულმა სატელეფონო საუბრისას თავად შეატყობინა, რომ ტყვიით მსუბუქად იყო დაჭრილი. მისივე ინფორმაციით, მისი ძმა თავდასხმის ადგილას მანქანას არემონტებდა, მომხდარის თვითმხილველი შემთხვევით გახდა და ძმის აღნიშნულ საქმესთან შემხებლობას გამორიცხავს.

შეგახსენებთ, რომ ქვემო ფონიჭალაში სამ მამაკაცს ცეცხლი მწვანე ფერის "ოპელის" მარკის ავტომობილიდან გაუხსნეს.
ორი მათგანი ადგილზე გარდაიცვალა, ხოლო მესამე საავადმყოფოში გუშინვე გადაიყვანეს.
გავრცელებული ინფორმაციით, გარდაცვლილებს რუსეთში ბიზნესი ჰქონდათ, ამიტომ არ გამოირიცხება, რომ მკვლელობა სწორედ მათ საქმიანობას უკავშირდებოდეს. ასევე ცნობილია, ისიც, რომ ერთ-ერთი გარდაცვლილი საქართველოში რუსეთიდან ორი დღის წინ დაბრუნდა. ადგილობრივების თქმით, თავადსხმა სწორედ ამ ადამიანზე განხორციელდა, მეორე კი სავარაუდოდ შემთხვევით მოკლეს.
მკვლელობა ავტოსახელოსნოში მოხდა, სადაც გარდაცვლილები ავტომობილის შესაკეთებლად იყვნენ მისული.

როგორც "ნიუპოსტს" შინაგან საქმეთა სამინისტროში განუცხადეს, მომხდარზე გამოძიება სისხლის სამართლის კოდექსის 109-ე მუხლით მიმდინარეობს, რაც დამამძიმებელ გარემოებებში განზრახ მკვლელობას გულისხმობს.