ზუგდიდის მერმა სტადიონის მშენებლობა დაათვალიერა

საზოგადოება - 18:24, 07 Apr, 2016

2692

ქალაქ ზუგდიდის მუნიციპალიტეტის მერმა, ირაკლი გოგოხიამ ზუგდიდში UEFA-ს მესამე კატეგორიის სტანდარტის შესაბამისი სტადიონის მშენებლობა დაათვალიერა. სტადიონის მშენებლობის პირველი ეტაპი აქტიურად მიმდინარეობს. ამჟამად ხორციელდება მიწის ზედა სამუშაოები, მუშაობს მძიმე ტექნიკა. სტადიონის პირველი ეტაპის სამუშაოებისთვის გამოყოფილია 9 747 000 ლარი. სულ კი სტადიონის მშენებლობისთვის 20 მილიონ ლარამდე დაიხარჯება. უეფას მესამე კატეგორიის შესაბამისი სტანდარტების სტადიონის სამშენებლო სამუშაოებს ტენდერში გამარჯვებული სმაშენებლო კომპანია “დაგი“ ახორცილებს. სტადიონს ორი მოედანი ექნება - ძირითადი, რომელიც 7 200-ზე მეტ მაყურებელზე იქნება გათვლილი და სათადარიგო - 1 224 მაყურებელს დაიტევს. ძირითადი მოედანი ბუნებრივ საფარიანი იქნება, ხოლო სათადარიგო - ხელოვნური საფარით მოეწყობა. სტადიონი თანამედროვე სტანდარტების მქონე ტექნიკით აღიჭურვება. სტადიონები და დამხმარე ინფრასტრუქტურა 6,5 ჰექტარ მიწის ფართობს დაიკავებს. ირაკლი გოგოხია: ,, ქალაქ ზუგდიდში, ე.წ. ,,კომბინატის დასახლებაში“ ბოლო ოცი წლის მანძილზე არანაირი ინფრასტრუქტურული პროექტი არ განხორციელებულა. სტადიონის მშენებლობით ჩვენ ხელს შევუწყობთ ამ უბანში ინფრასტრუქტურის განვითარებასა და ახალგაზრდებში ცხოვრების ჯანსაღი წესის დამკვიდრებას. ამ ეტაპზე მშენებლობაზე ასამდე ადგილობრივი მუშა ხელია დასაქმებული. მათი რაოდენობა თანდათან გაიზრდება, რადგან ჩვენ ეტაპობრივად ვგეგმავთ ტერიტორიის კეთილმოწყობას, გზის რეაბილიტაციასა და სხვა ინფრასტრუქტურულ სამუშაოებს“.