საზოგადოებრივი ჯანდაცვის ცენტრი ქალაქ ზუგდიდში საინფორმაციო შეხვედრებს მართავს

საზოგადოება - 18:37, 06 Apr, 2016

1809

საქართველოში C ჰეპატიტის ელიმინაციის პროგრამის ფარგლებში ინფექციური კონტროლის ღონისძიებები განსაკუთრებულ დატვირთვას იძენს. ზუგდიდის მუნციპალიტეტის საზოგადოებრივი ჯანდაცვის ცენტრმა, ქალაქ ზუგდიდის ტერიტორიაზე განთავსებული საზოგადოებრივი მნიშვნელობის დაწესებულებების ინვენტარიზაციის შემდეგ, დაწესებულებების წარმომადგენლებისათვის საინფორმაციო-განმარტებითი შეხვედრა გამართა. შეხვედრაზე ზუგდიდის მუნიციპალიტეტის საზოგადოებრივი ჯანდაცვის ცენტრის წარმომადგენლებმა, სილამაზის სალონების მეპატრონეებს, სტილისტებს, მანიკურის, პედიკურის, ტატუს 40 -ზე მეტ სპეციალისტს მთავრობის მიერ 2015 წლის 14 სექტემბერს დამტკიცებული № 473 დადგენილებით გათვალისწინებული ტექნიკური რეგლამენტი გააცნეს. აღნიშნული დადგენილების თანახმად, შესაბამისი ტექნიკური რეგლამენტი საზოგადოებრივი მნიშვნელობის დაწესებულებებში ესტეთიური და კოსმეტიკური პროცედურების წარმოებისას, ინფექციების პრევენციისა და კონტროლის სანიტარული ნორმების დამტკიცებას ითვალისწინებს. ზუგდიდის მუნიციპალიტეტის საზოგადოებრივი ჯანდაცვის ცენტრი, დაწესებულებების წარმომადგენლებისათვის საინფორმაციო-განმარტებითი შეხვედრების გამართვას მომავალშიც გეგმავს.