„ისეთი გზა გვინდა 2 წლის წინ ბატონ თემურ ჭკუასელს რომ გაუკეთეთ სახლამდე“

საზოგადოება - 16:24, 05 Apr, 2016

3087

ჩოხატაურის მუნიციპალიტეტის საჭამიასერის თემში შემავალი სოფლების, ჩომეთის და პატარჭალის მოსახლეობა ადგილობრივი ხელისუფლებისაგან გზისა და სოფელთან დამაკავშირებელი ხიდის გაკეთებას ითხოვს. ადგილობრივების განცხადებით, გზა მხოლოდ დეპუტატ ჭკუასელის სახლამდე მიიყვანეს.

„ისეთი გზა გვინდა 2 წლის წინ ბატონ თემურ ჭკუასელს რომ გაუკეთეთ სახლამდე, ისე მეზობლებისთვისაც რომ ეზრუნა ბატონ დეპუტატს არ იქნებოდა ურიგო. ბატონო ირაკლი ქვემო ხეთში თუ იყავით პატარჭალაშიც ამოსულიყავით, ჩომეთშიც საკუთარი თვალით ნახავდით შიდა გზები რა მდგომარეობაში გვაქვს, თუმცა შეიძლება ნახეთ კიდეც. ჩოხატაურის ცენტრში ბევრი ინფრასრუქტურული პროექტი გაკეთდაო, ეს ყველაფერი კარგია, მაგრამ ჩვენც ხომ ვართ ამ მუნიციპალიტეტის ერთეულის ნაწილი? გასაგებია, სოფელი ჩიხშია და თვალსაჩინო არ იქნება, მაგრამ ეს ჩვენი დანაშაული ხომ არ არის. გასული საუკუნის 90-იანი წლებიდან დღემდე შეიძლება ითქვას, რომ ამ სოფლების და მათი მოსახლეობის მდგომარეობა არაფრით გაუმჯობესებულა. არ განხორციელებულა არც ერთ ინფრასტრუქტურული პროექტი. საჭამიასერის თემში შემავალ ორ პატარა სოფელში, ჩომეთსა და პატარჭალაში მიგრაციის დონე 50%-ზე მაღალია, ყოველი მეორე სახლი გამოკეტილია, ისეთებიც არიან, წელიწადში ერთხელ ზაფხულობით, რომ სტუმრობენ საკუთარ კარ-მიდამოს, აქ უკიდურესად შეჭირვებული ოჯახები ცხოვრობენ ერთი-ორი გამონაკლისის გარდა, ღამით ნათურას ვერ ანთებენ თანხების დაზოგვის მიზნით, (ტელევიზორის გამოსხივებით სარგებლობენ), სოფელი ჩაბნელებულია, ეს სამწუხაროდ დროებამ მოიტანა ასე. სასიცოცხლო მნიშვნელობა აქვს ორ სოფელთან დამაკავშირებელ ხიდს და დაახლოებით 300-400მ გზას (მოკლე გზას) ამ ორი პატარა სოფლის მოსახლეობისთვის. შემოვლითი გზა ,სადაც პატარჭალის უკვე ცნობილი ხიდი გაკეთდა, გზაც და ხიდიც საფრთხის შემცველია. შიდა გზები სავალალო მდგომარეობაშია, წყლის გუბეები და ტყლაპოები არავის უკვირს, ნათელი წარმოსადგენია ამ გზას ბავშვი რომ გაივლის“ - ამბობს ადგილობრივი მცხოვრები, ანა კოლხი.

კოლხის თქმით, „ენერგო-პრო-ჯორჯიას“ წარმომადგენლებმა, ელექტროსადენები და მრიცხველები ხეებზე მიაგრეს, რაც ასევე საფრთხეს წარმოადგენს ადგილობრივებისთვის.

„ელექტროსადენი და მრიცხველები პირდაპირ ხეებზეა მიმაგრებული. არ არის ბატონებო ასე საქმე თქვენ რომ გგონიათ, აქ ხალხი ცხოვრობს და პატივი უნდა სცეთ საკუთარი ქვეყნის მოქალაქეებს, საკუთარ ბიზნესს და საკუთარ თავსაც, ამას „ენენრგო-პრო-ჯორჯიას“ მისამართით ვამბობ. მივმართავ ჩოხატაურის მუნიციპალიტეტის გამგებელს, ნუ ვაქცევთ ამ სოფლებს მგლების და ტურების სათარეშო ადგილად. იმედი გვაქვს, ამ ორ პატარა სოფელს ექნება „ოცნების ხიდი" და "ოცნების გზა". - აცხადებენ ადგილობრივები.

„იმ აბსურდზე, რომ მოსახლეობას საკუთარი აზრის გამოთქმის საშუალება არ ეძლევა ან ეშინია, კომენტარს არ გავაკეთებ. ჩვენი თანამოქალაქეები ძალიან აქტიურობენ კრებებზე და რა გადაწყვეტილებებსაც იღებენ, სოფლის დახმარების პროგრამის ფარგლებში, სწორედ ის საკითხები შედის ოქმებში. მათი აქტიურობა კარგად ჩანს ფოტოებზეც“. - აცხადებს მუნიციპალიტეტის გამგებელი, ირაკლი კუჭავა.

“სოფელ ჩომეთსა და პატარა ჭალაში 2014 წელს განხორცილდა რეაბილიტაცია-გამრიცხველიანების სამუშაოების, მაგრამ კომპანია სისტემატიურად განაგრძობს 0,4 კვ ქსელის სარეაბილიტაციო სამუშაოებს.არ არის გამოირცხული, რომ სადმე იყოს დაზიანებულ ბოძი. კონკრეტული პრობლემის შემთხვევაში აუცილებლად უნდა მიმართოს აბონენტმა კომპანიას, სადაც მოხდება აღნიშნულ საკითხის შესწავლა და მაქსიმალურად მოკლე დროში ა პრობლემის აღმოფხვრა”. - აცხადებენ „ენერო-პრო-ჯორჯიას“ პრესცენტრში.

თეა იოსელიანი- გურია