ქუთაისში ჟვანიას სკოლაში მედიატური მოეწყო

საზოგადოება - 15:28, 03 Apr, 2016

2349

ქუთაისში, ზურაბ ჟვანიას სახელობის სახელმწიფო ადმინისტრირების სკოლაში ცენტრალური და რეგიონული მედიის წარმომადგენლებისთვის მედიატური მოეწყო.

სკოლის საქმიანობის გაცნობა, სამომავლო გეგმები, შეხვედრა სკოლის ადმინისტრაციასა და საჯარო მოხელეებთან - ეს ის საკითხებია, რომელსაც მედიის წარმომადგენლები ორი დღის მანძილზე გაეცნენ.

ასევე, ჟურნალისტებმა ტურის ფარგლებში ქალაქში და იმერეთის რეგიონში არსებულ ღირსშესანიშნავი ადგილები, ბაგრატის ტაძარი, გელათის სამონასტრო კომპლექსი და წყალტუბოში არსებული პრომეთეს მღვიმე, მოინახულეს.

მედიატურის ფარგლებში ყურადღება გამახვილდა სახელმწიფო ადმინისტრირების სკოლაში დანერგილ სიახლეზე, რომელიც სახელმწიფო დაფინანსებით ქართული ენის სწავლებას ითავლისწინებს.

"სკოლა სრული სახელმწიფო დაფინანსებით უზრუნველყოფს სახელმწიფო ენის სწავლებას ნებისმიერი დაინტერესებული პირისთვის. იქნება ეს საქართველოს თუ უცხო ქვეყნის მოქალაქე, რომელიც ლეგალურად იმყოფება საქართველოში. ეს შეიძლება იყოს ინვესტორი, ტურისტი და ასეთ ცვლილებზე საზოგადოება უნდა იყოს ინფორმირებული," - განმარტა ზურაბ ჟვანიას სახელობის სახელმწიფო ადმინისტრირების სკოლის დირექტორმა, ქეთევან ჯაყელმა.

როგორც სკოლის ადმინისტრაციაში აცხადებენ, განსაკუთრებული ყურდაღება ეთმობა ეთნიკური უმცირესობების წარმომადგენლებს და სპეციალური საგანმანათლებლო პროგრამებით მათი სამოქალაქო ინტეგრაციის ხელშეწყობა ხდება.

"მათ ვასწავლით სახელმწიფო ენას და შემდეგ უკვე ეძლევათ შესაძლებლობა პროფესიული კუთხით აიმაღლონ კვალიფიკაცია," - ამბობს ქეთევან ჯაყელი.

ზურაბ ჟვანიას სახელობის სახელმწიფო ადმინისტრირების სკოლა 2005 წელს დაარსდა. 2014 წლიდან კი სკოლა განახლებული პროგრამით ფუნქციონირებს. სკოლაში საჯარო მოხელეთა გადამზადება ორი პროგრამით: სახელმწიფო ენის სწავლებისა და საჯარო მმართველობა-ადმინისტრირებით ხორციელდება.