თავდასხმა ეროვნული ნიშნით - უცნობი პირების ანტითურქული "გამოხტომა" გურიაში

კრიმინალი - 14:40, 02 Apr, 2016

4923

"გურიის მოამბის" მიერ მოპოვებული ინფორმაციით, ხულიგნობის ბრალდებით შსს-მ ერთი პირი მას შემდეგ დააკავა, როცა ის ოზურგეთი ჩოხატაურის ავტომაგისტრალზე მდებარე ხიდის სარეაბილიტაციო სამუშაოების მიმდინარეობისას, ხელმძღვანელს ფიზკური შეურაცხყოფა მიაყენა და თავი გაუტეხა.

შემთხვევა ამ დღეებში, ხსენებული ავტომაგისტრალის სოფელ ნაგომრის მონაკვეთზე, მდინარე ბახვისწყალზე გამავალი ხიდის რეაბილიტაციისას მოხდა.

"სამუშაო საათებში, ხიდთან მსუბუქი ავტომანქანა გაჩერდა, მან იქვე მდგომ ხელმძღვანელს სიგარეტი მოსთხოვა, შემდეგ ასანთი, ოდნავ მოგვიანებით კი უთხრა, თურქი ხარ ეროვნებით და რატომ გვჩაგრავ ქართველებსო, ხელმძღვანელმა განუმარტა რომ ის ეროვნებით ქართველი იყო, თუმცა თავდამსხმელი მანქანიდან გადმოხტა, ქვა აიღო და სამუშაოების მწარმოებელს თავში ჩაარტყა, თანაც პარალელურად ანტითუურქულ ლოზუნგებს გაჰყვიროდა"-გვიყვებიან თვითმხილველები.

როგორც "გურიის მოამბეს" შსს პრეს სამსახურიდან აცნობეს, მომხდარზე აღძრულია სისხლის სამართლის საქმე 120- ე მუხლით, ჟანმრთელობის განზრახ მსუბუქი დაზიანება, დაკავებულია ერთი პირი.

გურიაში ეს საეჭვო წარსული მქონე ადამიანების მხრიდან ანტითურქული "გამოხტომების" პირველი შემთხვევა არ არის.

ადგილობრივი ექსპერტები ამის მიზეზად, ბოლო ხანებში განსაკუთრებით ზღვარსგადასულ, რუსულ პროპაგანდას ასახელებენ.