უპრეცედენტო მოვლენა ქართულ კულტურაში - Google-ი ხელოვნების სასახლესთან თანამშრომლობას იწყებს

კულტურა - 11:23, 31 Mar, 2016

1676

საქართველოს ხელოვნების სასახლესა და Google-ს შორის ხელშეკრულება გაფორმდა.

გუგლის კულტურული ინსტიტუტი (Google Cultural institute) თეატრის, მუსიკის, კინოსა და ქორეოგრაფიის სახელმწიფო მუზეუმთან თანამშრომლობას იწყებს. ხელოვნების სასახლე საქართველოში პირველი სამუზეუმო ორგანიზაციაა, რომელიც მსოფლიოს ამ პრესტიჟული კულტურული ინსტიტუტის წევრი გახდა
Google-ის კულტურული ინსტიტუტი მსოფლიოში უდიდესი სახელოვნებო ვირტუალური გაერთიანებაა. მისი საშუალებით ხელოვნების სასახლეს საშუალება ეძლევა ქართული ეროვნული საგანძურის უნიკალური ნიმუშები სპეციალურ საიტზე განათავსოს., სადაც უკვე განთავსებულია მიქელანჯელოს, ლეონარდო დავინჩის, ბოტიჩელის, კარავაჯოს, ვან გოგის და სხვათა ნამუშევრები.
პირველ ეტაპზე მზადდება პეტრე ოცხელის, გიგო გაბაშვილის, ლადო გუდიაშვილის, ელენე ახვლედიანის, დავით კაკაბაძის, სერგო ქობულაძის, ქეთევან მაღალაშვილის, კირილე ზდანევიჩის, ლეონ ბაქსტის, ფრანსუა ლეჟეს, მიქელანჯელო მეუჩის და სხვათა ტილოები, ასევე ჩაიტვირთება გამოყენებითი ხელოვნების უნიკალური ნიმუშები, კინო და თეატრალური კოსტუმები, ხელნაწერები, ძვირფასი ფაიფური, არქეოლოგიური ნივთები, ძვირფასი ლითონისაგან დამზადებული ხელოვნების ნიმუშები.
ხელოვნების სასახლე კავკასიის მეოთხე მუზეუმია, რომელიც ინსტიტუტის წევრი გახდა, აზერბაიჯანი ინსტიტუტში სამი მუზეუმითაა წარმოდგენილი, სომხეთი კი ჯერ-ჯერობით არცერთით. საქართველოს ხელოვნების სასახლე “Google”-ს კულტურულ ინსტიტუტში ვირტუალურ მოგზაურობისა და ექსპონატების 3 დ ჩვენების განხორციელებასაც გეგმავს.