ფესტივალ „ფანARTის" ფარგლებში ფოლკლორის საღამო მოეწყო

ფესტივალ „ფანARTის" ფარგლებში ფოლკლორის საღამო მოეწყო - ფოტო

კულტურა - 22:28, 29 Mar, 2016

871

დღეს, ფესტივალ „ფანARTის" ფარგლებში, ბავშვთა და ახალგაზრდობის ეროვნული ცენტრის კინოდარბაზში ფოლკლორის საღამო მოეწყო, სადაც ქართულ-ხალხური სიმღერები შესრულდა. კონცერტი გ. თავართქილაძის სახელობის უნივერსიტეტის ფოლკლორულმა ანსამბლმა „ივერთამ“ გახსნა, სცენაზე ერთმანეთს ენაცვლებოდნენ ანსამბლები: „იავნანა“ ( საპატრიარქოს ახალგაზრდული ცენტრი), გიორგი მთაწმინდელის სახელობის საეკლესიო გალობის უმაღლესი სასწავლებლის მომღერალთა გუნდი, „ფერხისა“ (ბავშვთა ფოლკლორული ანსამბლი) და ლანჩხუთის მუნიციპალიტეტის სოფელ ჩოჩხათის საჯარო სკოლის ანსამბლი. საღამო თბილისის სახელმწიფო სამედიცინო უნივერსიტეტის ანსამბლმა „დეკამ“დახურა. მონაწილეების მიერ შესრულებულ ქართულ-ხალხურ სიმღერებს დარბაზში მსხდომთა მქუხარე აპლოდისმენტები და ფესტივალის კონსულტანტის სვიმონ ჯანგულაშვილის განსაკუთრებული შეფასება მოჰყვა; „ გახარებული ვარ როგორც მუსიკოსი. ფანარტი არის მოვლენა, რომელიც ნიჭიერ ახალგაზრდებს თვითგამოხატვისა და სცენაზე დგომის საშუალებას აძლევს“ -აღნიშნა კონსულტანტმა.

ფესტივალი ფანარტი ხვალ სტენსილსა და ფოტოგრაფიას დაეთმობა. ,,სტენსილის დარგში გავიცნობთ ყველაზე პატარა მონაწილეს, 13 წლის ლევან ტყაბლაძეს, ხოლო თავად კონსულტანტი DR.LOVE და მირიან შენგელაია სტენსილის პერფორმანსს შემოგვთავაზებენ. ფოტოგრაფიაში ჩვენმა უცვლელმა კონსულტანტმა გურამ წიბახაშვილმა საკუთარი არჩევანი აბო ახვლედიანის, ანა რეხვიაშვილის, ნანა კუჭუხიძის, ნინო სირბილაძისა და თამარ გელაშვილის ფოტოებზე შეაჩერა“ - აცხადებენ ფესტივალის ორგანიზატორები.