დავით ლორთქიფანიძისა და თამაზ მეჭიაურის დაკითხვის მოთხოვნით კამპანია „ეს შენ გეხებაში“ ჩართული არასამთავრობო ორგანიზაციებმა შესაძლოა პროკურატურას მიმართონ. მათი თქმით, აუცილებელია გამოძება დაინტერესდეს, თუ რა ინფორმაციას ფლობენ ფარულ კადრებთან დაკავშირებით მმართველი გუნდის წარმომადგენლები.

„ის განცხადებები, რაც საპარლამენტო უმრავლესობის ზოგიერთმა წარმომადგენელმა გააკეთა, შეიძლება გახდეს იმის საფუძველი, რომ საგამოძიებო ორგანოები დაინტერესდნენ რა ინფორმაციას ფლობენ ეს დეპუტატები იმ კადრებთან დაკავშრებით, რაც გავრცელდა და იმ კადრებზე, რისი გავრცელებაც არის დაანონსებული. უნდა მოხდეს ნათლად დეკლარირება იმისა, რომ ეს არაეთიკური განცხადებები ეკუთვნის კონკრეტულ დეპუტატებს და არა პოლიტიკურ ჯგუფს, თუ ეს ასეა, იმ ზღვარზეა მისული, რომ შესაძლოა ასეთი გამიჯვნა აღარც იყოს საკმარისი და დადგეს პარტიის მხრიდან ამ პირების მიმართ გარკვეული სადამსჯელო მექანიზმის ამოქმედება ან გარიცხვის საკითხი“, - აცხადებენ მესამე სექტორში.