თბილისის მერის მოადგილემ ვეძისის დასახლებაში მუსლიმებს ნოვრუზ ბაირამის დღესასწაული მიულოცა

საზოგადოება - 15:20, 21 Mar, 2016

1324

თბილისის მერის მოადგილემ გიორგი ლილუაშვილმა და საბურთალოს რაიონის გამგებელმა ბექა მიქაუტაძემ ვეძისის დასახლებაში მცხოვრებ მუსლიმებს ნოვრუზ ბაირამის დღესასწაული მიულოცეს.

ზემო ვეძისში მდებარე სალოცავთან მცხოვრებმა მუსლიმებმა თბილისის მერის მოადგილეს და გამგებელს უმასპინძლეს. მოსახლეობამ გიორგი ლილუაშვილს და ბექა მიქაუტაძეს განხორციელებული პროექტებისთვის და თანადგომისათვის მადლობა გადაუხადა.

„საინტერესო შეხვედრა იყო. ვისაუბრეთ პრობლემებზე, მიმდინარე თემებზე. ბევრი საკითხი ოპერატიულ რეჟიმში გადავწყვიტეთ, ცალკეულ საკითხებს კი, ერთობლივი ძალისხმევით მოვაგვარებთ“, - განაცხადა გიორგი ლილუაშვილმა.

ბექა მიქაუტაძის თქმით, აზერბაიჯანელებს და ქართველებს განსაკუთრებული ურთიერთობა აქვთ, რაც მომავალშიც გაგრძელდება.

„ნოვრუზ ბაირამის დღესასწაული ახალი სიცოცხლის სიმბოლოა და მოვედით, რომ მივულოცოთ აზერბაიჯანელ ხალხს. აზერბაიჯანელ მოსახლეობასთან ჩვენ გვაქვს მყარი და მჭიდრო ურთიერთობა და მინდა ვისურვო, რომ ასეთი ერთობა საუკუნეები გაგრძელდეს“, - განაცხადა ბექა მიქაუტაძემ.

ნოვრუზ ბაირამი გაზაფხულის შემოსვლის, ზოგიერთ ქვეყანაში კი, ახალი წლის დღესასწაულია. მუსლიმები 21 მარტს დღისა და ღამის გათანასწორების, დედამიწის გამოცოცხლებისა და სიცოცხლის დაწყების დღედ მიიჩნევენ.

ნოვრუზ ბაირამი საქართველოში საერთო სახალხო დღესასწაულად 2010 წლიდან აღინიშნება.