აჭარის რეგიონს ექვსი დღით ბუნებრივი აირის მიწოდება შეუწყდება

საზოგადოება - 11:47, 20 Mar, 2016

2123

მიმდინარე წლის 29 მარტიდან 3 აპრილის ჩათვლით აჭარის რეგიონში, ბუნებრივი გაზის მიწოდება ქობულეთის, ბათუმისა და ხელვაჩაურის მუნიციპალიტეტებს შეუწყდება.

„სოკარ ჯორჯია გაზი" - ს განმარტებით, ამის მიზეზი, აჭარის რეგიონში ქობულეთი - ბათუმის ახალი საავტომობილო მაგისტრალის მშენებლობის პროცესში ცენტრალურ მაგისტრალურ გაზსადენზე გადაერთების სამუშაოებია, კერძოდ, მშენებარე ახალი საავტომობილო მაგისტრალისა და ბუნებრივი გაზის ცენტრალური მაგისტრალის, რამდენიმე მონაკვეთზე გადაერთების სამუშაოები ერთდროულად 6 პუნქტზე განხორციელდება.

„სოკარ ჯორჯია გაზი“ ბუნებრივი გაზის ჩართვას ქობულეთი, ბათუმი, ხელვაჩაურის მუნიციპალიტეტებისთვის ეტაპობრივად განახორცილებს, მიწოდება სრულად იქნება აღდგენილი 3 აპრილისათვის.

კომპანია „სოკარ ჯორჯია გაზი" ბოდიშს გიხდით დისკომფორტისთვის და მოუწოდებს აბონენტებს, უყურადღებოდ არ დატოვონ გაზის დანადგარები და ჩაკეტილ მდგომარეობაში იქონიონ ბინებში არსებული გაზის ონკანები, რათა ბუნებრივი გაზის ჩართვის პროცესში დაცული იქნას უსაფრთხოების წესები.

ამ პერიოდში „სოკარ ჯორჯია გაზი" - ს აჭარის რეგიონალური ოფისი, სრული შემადგენლობით 24 საათიან სამუშაო რეჟიმზე გადავა. დამატებითი ინფორმაციის მიღება შესაძლებელია ,,სოკარ ჯორჯია გაზის" ცხელ ხაზზე 16 114 ან ვებ-პორტალზე www.mygas.ge.