"ვაცხადებთ, რომ არავის პირადი ცხოვრება არ გვაინტერესებს"- NGO-ები აქციაზე "ეს შენ გეხება"

საზოგადოება - 18:18, 19 Mar, 2016

1188

უკანონო თვალთვალის გასაპროტესტებლად დღეს აქცია „ეს შენ გეხება“ თბილისსა და საქართველოს რამდენიმე ქალაქში ჩატარდა. არასამთავრობო ორგანიზაციები, პოლიტიკოსები, რიგითი მოქალაქეები თუ ცნობილი სახეები პირადი ცხოვრების კადრებით ადამიანის დატერორებას და დაშანტაჯებას აპროტესტებდნენ

„თუ საზოგადოება დაუშვებს, რომ სახელმწიფო მანქანა იყოს გამოყენებული ადამიანის დატერორებისა და საზოგადოების შანტაჟისთვის, ვერავის ექნება გარანტია, რომ მისი უფლება იქნება დაცული“ - განაცხადა აქცია-მსვლელობის დროს საქართველოს ახალგაზრდა იურისტთა ასოციაციის ხელმძღვანელმა, ანა ნაცვლიშვილმა.

„აქ შეკრებილი საზოგადოება ვაცხადებთ, რომ არავის პირადი ცხოვრება არ გვაინტერესებს და ამ ვიდეოს გამავრცელებლებს ვეუბნებით, რამდენიც არ უნდა გაავრცელონ, ვერავის ვერ შეაშინებთ და დააშანტაჟებთ“ - აღნიშნა სამართლიანი არჩევნების წარმომადგენელმა, ნინო ლომჯარიამ.

„საერთაშორისო გამჭვირვალობა საქართველოს“ ხელმძღვანელის ეკა გიგაურის თქმით ამ აქციით საზოგადოებამ იმ ადამიანებს, ვინც პირადი ცხოვრების კადრები გადაიღო და გაავრცელა აჩვენა, რომ მათ მიზანს, საზოგადოების დაშინებას ვერ მიაღწიეს.

„ჩვენ ნამდვილად არ გვეხება სხვისი პირადი ცხოვრება. ჩვენ გვინდა ვუთხრათ იმ ჯგუფს ვინც ეს ყველაფერი გააკეთა, რომ ისინი თავის მიზანს ვერ მიაღწევენ. დღევანდელი აქციის მიზანი არის ის რომ მოვითხოვოთ პირველი- ჩატარდეს გამოძიება უკვე მომხდარ ფაქტებზე, ამ გამოძიებაში ჩაერთონ საერთაშორისო ექსპერტები, შეიქმნას დამოუკიდებელი ორგანო რომელიც სამართალდამცავი ორგანოების დანაშულს გამოიძიებს და მეოთხე, გაკეთდეს ყველაფერი იმისთვის, რომ უკანონო მოსმენები და თვალთვალი აღარ მოხდეს“- განაცხადა გიგაურმა