მაკა ასათიანი ადვოკატი, გიორგი გვენეტაძე არ ადასტურებს გავრცელებულ ინფორმაციას მის შესახებ, რომ ასათიანსა და გაჩეჩილაძეს შორის მოლაპარაკებები დაიწყო:

"მე არ გამაჩნია ინფორმაცია ამასთან დაკავშირებით, ამიტომ ვერ გეტყვით, შედგა თუ არა ეს კომუნიკაცია. ჩემი ინფორმაციით, მაკა ასათიანი უახლოეს საათებში გააკეთებს განცხადებას, რომელიც ნათელს მოჰფენს მის რეალურ პოზიციას მიმდინარე მოვლენებთან დაკავშირებით“, - განაცხადა მაკა ასათიანის ადვოკატმა გიორგი გვენეტაძემ.

"მაესტროს" ერთ-ერთი დამფუძნებელის მამუკა ღლონტის თქმით, ის და ეკა აკობია მოლაპარაკებებში მონაწილეობას არ მიიღებენ.

"არც მე და არც ეკა აკობია ამ მოლაპარაკებებში მონაწილეობას არ მივიღებთ, პირველ რიგში იმიტომ, რომ ჩვენი წილი იმდენად პატარაა, რომ არ წყვეტს არაფერს და მეორეს მხრივ, იმიტომ, რომ ის, რაც ჩვენია, იმაზე სამართლებრივ ბრძოლას გავაგრძელებთ ნებისმიერ შემთხვევაში“, - აღნიშნა მამუკა ღლონტმა.