„მაესტროს“ ერთ-ერთმა დამფუძნებელმა, ეკა აკობიამ საგანგებო ბრიფინგი გამართა და დაპირისპირებულ მხარეებს მოლაპარაკების რეჟიმში გადასვლისკენ მოუწოდა. აკობიას განცხადებით მხოლოდ ეს არის ერთადერთი გამოსავალი შექმნილი ვითარებიდან:

„მე ვარ „მაესტროს“ ერთ-ერთი დამფუძნებელი, დამფუძნებელი, რომელმაც 21 წლის წინ ჩემს თანამოაზრეებთან ერთად დავაფუძნე ბრენდი „მაესტრო“, სტუდია „მაესტრო“, ტელეკომპანია „მესტრო“ და ვიზრუნე იმისთვის, რომ ამ ტელეკომპანიას შექმნოდა იმიჯი, რამდენიმე წლის შემდეგ ტელეკომპანია „მაესტრო“ იქცა ნდობის რეიტინგით პირველ ტელეკომპანიად. ჩემდა სამწუხაროდ, ბოლო დროს განვითარებულმა მოვლენებმა ეს იმიჯი საგრძნობლად დააზიანა.

დღეს დადგა დრო, რომ მხარეებმა რომლებიც მონაწილეობენ დავაში, რომლებიც მაესტროს იმიჯს ბღალავენ, შეურაცხყოფენ, დასვან წერტილი. უკვე დადგა დრო, რომ მედია მფლობელებმა გაიხსენონ, მედია არ არის ჩხუბის ტირაჟირების ადგილი. ჩვენგან მაყურებელი ელის დაბალანსებულ ინფორმაციას, ეს არ არის მფლობელთა ჩხუბის პოლიგონი.

მე ვთავაზობ ორივე მხარეს და არ წარმოვადგენ არცერთ მხარეს, ამ დავაში ნეიტრალური ადგილი მიჭირავს, დასხდნენ მოლაპარაკების მაგიდასთან. დროა ყველანაირი კონფლიქტი გადაიტანონ კაბინეტურ სიტუაციაში და არ გამოიტანონ ცისფერ ეკრანებზე.

ვიღებ ვალდებულებას და ამას შევასრულებ, ორივე მხარეს დაველაპარაკო, რომ ისინი დასხდნენ მოსალაპარაკებლად, მისცენ თანამშრომლებს, ტელეკომპანიის ჟურნალისტებს საშუალება, რომ მათ იმუშაონ ჯანსაღ, ნორმალურ გარემოში. ყველამ აიღოს თავისი წილი პასუხისმგებლობა და თანამშრომლებს მოექცნენ როგორც ნამდვილ ადამიანებს და არა ხორცს, რომელსაც იყენებენ. ჩემი აზრით ეს არის ბოლო შანსი და გამოსავალი იმ სიტუაციიდან, რომელიც დღეს ტელეკომპანიაში არსებობს. ვერცერთი მხარე ბრძოლას ვერ მოიგებს ეს არის გზა არსაით. დასრულდეს ეს გაუთავებელი ჩხუბი და გადავიდეს მშვიდ მოლაპარაკებების რეჟიმში, მხოლოდ ეს გადაარჩენს ტელეკომპანია „მაესტროს“, სხვა შემთხვევაში ჩვენ პასუხისმგებლობას ვერ ვიღებთ, რომ ჩვენ ვართ მხოლოდ მფლობელები“, - განაცხადა ეკა აკობიამ.