დღეს 7 საათზე აკაკი დევაძის მხარდასაჭერად საქველმოქმედო მატჩი გაიმართება

საზოგადოება - 18:35, 15 Mar, 2016

1443

სპორტისა და ახალგაზრდობის საქმეთა სამინისტროს ინიციატივით “სპორტსმენთა სოლიდარობის ფონდი“ შეიქმნება, რომელიც ჯანმრთელობის პრობლემების მქონე მოქმედ და ვეტერან სპორტსმენებს დახმარებას გაუწევს. ამ მიმართულებით პირველი ნაბიჯი გადაიდგა - სამინისტრომ და ფეხბურთის ფედერაციამ 10-10 ათასი ლარი გადარიცხეს საქართველოს ნაკრების ყოფილი მეკარის, აკაკი დევაძის ანგარიშზე, რომელმაც 2005 წლის 30 მარტს მიხეილ მესხის სახელობის სტადიონზე მძიმე ტრავმა მიიღო. მას შემდეგ მისი ჯანმრთელობის მდგომარეობა რთულია. ვეტერან ფეხბურთელს ძვირადღირებული ოპერაცია სჭირდება.

15 მარტს, 19:00 საათზე, ახალ სპორტის სასახლეში გაიმართება საქველმოქმედო მატჩი აკაკი დევაძის მხარდასაჭერად, რომელშიც მონაწილეობას მიიღებენ: სპორტისა და ახალგაზრდობის საქმეთა მინისტრი ტარიელ ხეჩიკაშვილი, ფეხბურთის ფედერაციის პრეზიდენტი ლევან კობიაშვილი, ვეტერანი ფეხბურთელი ოთარ გაბელია, მსოფლიოს და ევროპის ჩემპიონი თავისუფალ ჭიდაობაში, 2015 წლის საქართველოს საუკეთესო სპორტსმენი ვლადიმერ ხინჩეგაშვილი, მსახიობი ბესო ბერულაშვილი, ვეტერანი და მოქმედი სპორტსმენები, სპორტული ჟურნალისტები. “სპორტსმენთა სოლიდარობის ფონდში“ სურვილისამებრ, თანხას ჩარიცხავენ სპორტული ფედერაციები და სპორტსმენები.