არასამთავრობო ორგანიზაციები მასშტაბური აქციისთვის ემზადებიან

საზოგადოება - 10:41, 14 Mar, 2016

1654

არასამთავრობო ორგანიზაციები მასშტაბური აქციისთვის ემზადებიან. 19 მარტს დაგეგმილ აქციაზე, მესამე სექტორი ფარული ჩანაწერების გავრცელების ფაქტის დროულად გამოძიებას და დამნაშავეთა დასჯას მოითხოვენ.

კამპანიაში „ეს შენ გეხება, ისევ გვისმენენ“ ჩართული არასამთავრობოები დღეს საგანგებო განცხადებას გაავრცელებენ. სამოქალაქო სექტორი ხელისუფლების მხრიდან ქმედითი ღონისძიებების გატარებას მოითხოვს, ისინი პრემიერ-მინისტრთან და ძალოვანი უწყების პირველ პირებთან შეხვედრას მოითხოვენ. ,,ეს შენ გეხება" ფარულ ვიდე კადრების გავრცელებასთან დაკავშირებით სპეციალური საგამოძიებო კომისიის შექმნას ითხოვს.

„ჩვენ ამ განცხადებით კონკრეტულ მოთხოვნებს წავუყენებთ ხელისუფლებას. კერძოდ, აქცენტს ვაკეთებთ გამოძიებაზე, მათ შორის იმ პრობლემებზე, რომლებიც აქამდეც ცნობილი იყო ხელისუფლებისთვის, მაგრამ არავინ არ დასჯილა და კონკრეტული შედეგები გამოძიებას არ დაუდია. ასევე, ჩვენ მოვითხოვთ, რომ სახელმწიფომ შეიმუშავოს უფრო ქმედითი ღონისძიებები პრევენციისათვის“, - განაცხადა ქალთა მოძრაობის წევრმა, ბაია პატარაიამ.

"ჩვენ მოვითხოვთ კითხვებზე პასუხებს, თუ რა კეთდებოდა ფარულ ჩანაწერებთან საბრძოლველად. ჩვენ ვხედავთ სერიოზულ პრობლემებსა და შეცდომებს, რომლებიც ამ გზაზე იყო დაშვებული და სწორედ ამიტომ მივედით იმ მომენტამდე, სადამდეც მივიდა სახელმწიფო და საზოგადოება. გამოძიება მიმდინარეობს, მაგრამ ეს მაღალი ნდობით არ სარგებლობს, ამიტომ მოვითხოვთ სპეციალური საგამოძიებო ფორმატის შექმნას ამ ფაქტების და ზოგადად, ფარული ჩანაწერების საკითხთან დაკავშირებით. ასევე დავსვამთ საკითხებს, რომელიც ეხება დამოუკიდებელი საგამოძიებო მექანიზმების შექმნას", - განაცხადა ,,ახალგაზრდა იურისტთა ასოციაციის“ თავმჯდომარემ ანა ნაცვლიშვილმა.