თბილისის სახელმწიფო უნივერსიტეტის რექტორი, ვლადიმერ პაპავა თსუ-ში მიმდინარე მოვლენებს ეხმაურება და აცხადებს, რომ თანამდებობიდან გადადგომას არ აპირებს, რადგან მსგავსი ქმედება უნივერსიტეტს გაცილებით უარეს სიტუაციაში ჩააყენებს:

"ნამდვილად არ ვგეგმავ გადადგომას. დღეს უნივერსიტეტში არის საკმაოდ რთული ვითარება. კანცლერი არ არის. ახლა რექტორის გადადგომა წარმოგიდგენიათ რას ნიშნავს? ესე იგი, დარჩება უნივერსიტეტი საერთო მმართველის გარეშე. გარდა ამისა, ძალიან რთული ჩანაწერია "უმაღლესი განათლების შესახებ" კანონში. რექტორის გადადგომის შემთხვევაში, მოვალეობის შემსრულებელს ირჩევს მთელი უნივერსიტეტი. მთელმა უნივერსიტეტმა რომ რექტორის მოვალეობის შემსრულებელი დაასახელოს, ამას საკმაოდ ხანგრძლივი პროცედურები დასჭირდება", - განაცხადა ლადო პაპავამ.

შეგახსენებთ, რომ თბილისის სახელმწიფო უნივერსიტეტის სტუდენტები აპროტესტებენ სენატის არჩევნებში გიორგი გაფრინდაშვილის კანდიდატურას. ისინი მოითხოვენ სენატის წევრებთან საუბარს და გაფრინდაშვილის კანდიდატურის მოხსნას.

„ავტონომია უნივერსიტეტს“ - აქცია აღნიშნული სახელწოდებით თსუ-ს პირველი კორპუსის ეზოში 15:00 საათზე გაიმართება.