თბილისის სახელმწიფო უნივერსიტეტის რექტორი, ვლადიმერ პაპავა თანამდებობიდან გადადგომას არ აპირებს, მიუხედავად იმისა, რომ მიმდინარე მოვლენებში მისი დისკრედიტაციის მცდელობას ხედავს.

პაპავას განცხადებით, პირადად მას გიორგი გაფრინდაშვილის საწინააღმდეგო არაფერი არ აქვს, გადაწყვეტილება კი თავად კანცლერობის კანდიდატმა უნდა მიიღოს.

რექტორის განცხადებით, მიმდინარე მოვლენები უნივერსიტეტში სასწავლო პროცესს არ ჩაშლის.

„უნივერსიტეტი ვერც კანონს და ვერც წესდებას ვერ დაარღვევს. ამიტომ, უნივერსიტეტს დღეს რაიმე დათმობაზე წასვლა არ შეუძლია, რადგან ჩიხიდან ამოვვარდებით. მოთხოვნა ის კი არ არის, რომ უნივერსიტეტმა დაარღვიოს კანონი, არამედ სტუდენტები პიროვნებას უყენებენ მოთხოვნას, რომ მოხსნას კანდიდატურა. გიორგი გაფრინდაშვილთან ურთიერთობაში არავითარი პრობლემა არასდროს არ მქონია, მასთან არაერთხელ მქონდა საუბარი და მას საკუთარი გადაწყვეტილებები აქვს. მან ჩემთან განაცხადა, რადგან აკადემიურმა საბჭომ, უმრავლესობამ, გამოუცხადა მას ნდობა, სურს რომ გაამართლოს ეს ნდობა, ოფიციალურად მისი პასუხი იყო ასეთი“, - განაცხადა დღეს გამართულ პრესკონფერენციაზე ვლადიმერ პაპავამ.

შეგახსენებთ, რომ თბილისის სახელმწიფო უნივერსიტეტის სტუდენტები აპროტესტებენ სენატის არჩევნებში გიორგი გაფრინდაშვილის კანდიდატურას. ისინი მოითხოვენ სენატის წევრებთან საუბარს და გაფრინდაშვილის კანდიდატურის მოხსნას.

„ავტონომია უნივერსიტეტს“ - აქცია აღნიშნული სახელწოდებით თსუ-ს პირველი კორპუსის ეზოში 15:00 საათზე გაიმართება.