სტუდია მაესტროს ახალი დირექტორი დღეს საქალაქო სასამართლოში სარჩელის შეტანას გეგმავს. ლევან გაჩეჩილაძე მოითხოვს არ მიეცეს „მაესტროს“ სახელისა და ლოგოს გამოყენების უფლება ტელეკომპანია „მაესტროს“, რომლის 100 %-ის წილის მფლობელი ილია კიკაბიძეა.

კიკაბიძის განცხადებით კი სახელიც და ლოგოც მისი და მისი მეგობრების შექმნილია, 2011 წლის შემდეგ კი ორივე მისი საკუთრებაა.

ილია კიკაბიძე უახლოეს დღეებში მაუწყებლობის დაწყებას „მაესტროს“ სახელით გეგმავს. მაუწყებლობა კი იმავე შენობიდან გავა, სადაც ტელეკომპანია ამჟამად არის განთავსებული.

„მე, როგორც შპს ტელეკომპანია მაესტროს დირექტორი, გადაწყვეტილი მაქვს, რომ ამ სახელით მაუწყებლობა უახლოეს დღეებში დავიწყო. პარტნიორობისთვის ქალბატონ მაკა ასათიანს მივმართე, ვიცი რომ მის კომპანიას სარეკლამო კონტრაქტი აქვს გაფორმებული ტელე „იმედთან“, ამ კონტრაქტის ფარგლებში ტელეკომპანიის ფინანსური უზრუნველყოფა მოხდება. ეს სახელი ჩემი და ჩემი მეგობრების მოფიქრებულია, რომელსაც სატელევიზიო სფეროში ვიყენებდით და ეს ყველასთვის ცნობილია“, - განაცხადა ილია კიკაბიძემ.

აღნიშნულ შეთავაზებას მაკა ასათიანმა გუშინ გავრცელებული განცხადების საშუალებით უპასუხა და მზადყოფნა გამოთქვა, დათანხმდეს ილია კიკაბიძის წინადადებას.

"გავეცანი ილია კიკაბიძის განცხადებას დამოუკიდებელი მაუწყებლობის დაწყების შესახებ და მინდა განვაცხადო, რომ ეს გადაწყვეტილება ჩემთვის სრულიად გასაგები და მისაღებია.

ჩემთვის ცნობილია, რომ მთელი ამ ხნის განმავლობაში, რაც დაიწყო რეიდერული შეტევა მაესტროზე, ი. კიკაბიძე, როგორც მაესტროს ერთ–ერთი დამფუძნებელი პარტნიორი, თავს იკავებდა აემოქმედებინა თავისი ლეგიტიმური უფლებები მაესტროს ლოგოზე და ასევე დამოუკიდებელი ტელეარხის ავტორიზაცია, რომელიც დიდი ხანია გააჩნია მხოლოდ იმიტომ, რომ ხელი არ შეშლოდა მაუწყებლობას.

თუმცა, მას შემდეგ, რაც ხელების გადაგრეხვით და სრულიად უკანონოდ გიორგი გაჩეჩილაძემ მოიპოვა მაესტროს საკონტროლო პაკეტი, ამჟამად კი ახალი დირექტორი ლევან გაჩეჩილაძე არაორაზროვნად აცხადებს, რომ აკეთებს ახალ ტელევიზიას, ახალ ადგილას, ბუნებრივია, რომ მაესტროს გადარჩენისათვის ბაჩო კიკაბიძის მხრიდან გადადგმული იქნეს ეს სამართლიანი ნაბიჯი. მით უფრო სასიხარულოა, რომ მან თანამშრომლობისათვის მიმართა მამუკა ღლონტსაც.

ვინაიდან მეც ვთვლი, რომ აუცილებელია გაკეთდეს ყველაფერი მაესტროს გადასარჩენად, ვაცხადებ მზადყოფნას და თანხმობას, რომ გადავცე ბაჩო კიკაბიძის ტელეკომპანიას შენობა ტელევიზიის ფუნქციონირებისათვის“, - ნათქვამია ასათიანის მიერ გავრცელებულ განცხადებაში.