ბაბუშერადან გამოდმოსვენებულთა სამოქალაქო პანაშვიდს პრეზიდენტი ესწრება

საზოგადოება - 12:26, 05 Mar, 2016

1908

ბაბუშერას აეროპორტში დაღუპულების სამოქალაქო პანაშვიდი სამების საკათედრო ტაძარში მიმდინარეობს. იქ იმყოფება საქართველოს პრეზიდენტი გიორგი მარგველაშვილიც.

პრეზიდენტთან ერთად იმყოფება თავდაცვის მინისტრი, თინა ხიდაშელი.

როგორც ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი სოზარ სუბარი ამბობს, უახლოეს პერიოდში კიდევ 12 ნეშთის, შემდეგ კი კიდევ 20 ნეშთის გადმოსვენება მოხდება.

აფხაზეთის ომის დროს ბაბუშერას აეროპორტში თვითმფრინავის აფეთქებისას დაღუპული კიდევ 10 მებრძოლის ნეშტის იდენტიფიცირება მას შემდეგ მოხერხდა რაც ისინი ოკუპირებული ვტერიტორიიდან გადმოასვენეს.

აფხაზეთიდან გადმოსვენებულ მებრძოლებს დიღმის ძმათა სასაფლაოზე დღეს 5 მარტს, 15:00 საათზე სამხედრო პატივით დაკრძალავენ.

2010 წელს წითელი ჯვრის ეგიდით შეიქმნა ორმხრივი საკოორდინაციო ჯგუფი, რომელიც 1992-1993 წლებში ქართულ-აფხაზური კონფლიქტის შედეგად უგზო-უკვლოდ დაკარგულთა მოძიების საკითხებს შეისწავლის. მოლაპარაკების შედეგად გადაწყდა ბაბუშერას ძმათა სასაფლაოს გახსნა და ცხედრების ექსჰუმაცია.

ბაბუშერას ძმათა სასაფლაოზე სამარხის გახსნის შემდეგ, იდენტიფიცირების მიზნით, ნეშტები გადმოსვენებულ იქნა ლევან სამხარაულის სახელობის სასამართლო ექსპერტიზის ეროვნულ ბიუროში. საქართველოში ჩატარებული გენეტიკური პროფილები ხორვატიაში, ზაგრების უნივერსიტეტის დნმ ლაბორატორიაში გაიგზავნა. ამ ეტაპზე, სულ იდენტიფიცირებულია 31 ნეშტი.
უახლოეს მომავალში მოხდება ბაბუშერას ძმათა სასაფლაოდან გადმოსვენებული კიდევ 12 ნეშტის იდენტიფიცირება. დევნილთა და განსახლების სამინისტროსა და აფხაზეთის დე ფაქტო მთავრობის წარმომადგენლებს შორის მიმდინარე მოლაპარაკებების შედეგად, 2016 წელს კიდევ ორი სამარხი გაიხსნება, საიდანაც 100-ზე მეტ ცხედარს გადმოასვენებენ.