ე.წ. ღორის გრიპით ზუგდიდის საავადმყოფოში 5 ადამიანია მოთავსებული

ე.წ. ღორის გრიპით ზუგდიდის საავადმყოფოში 5 ადამიანია მოთავსებული - მათი მდგომარეობა მძიმეა

საზოგადოება - 12:10, 27 Feb, 2016

2848

ზუგდიდის რეფერალურ საავადმყოფოს რეანიმაციულ განყოფილებაში ე.წ. ღორის გრიპის ვირუსით ამ დროისთვის 5 ადამიანია მოთვსებული. მათ შორის ერთ-ერთი ზუგდიდში მცხოვრები 15 წლის ბიჭია. როგორც მედიკოსებმა „ნიუპოსტს“ განუცხადეს, ხუთივე მათგანის მდგომარეობის გართულება დაგვიანებულმა მკურნალობამ გამოიწვია.

როგორც „ნიუპოსტის“ ადგილობრივი კორესპოდენტი იტყობინება, სავარაუდოდ H1N1-ის ვირუსით გუშინ ზუგდიდის რეფერეალურ საავადმყოფოში კიდევ 4 ადამიანია მოთავსებული. მედიკოსების თქმით, ტესტები თბილისშია გადაგზავნილი და საბოლოო დიაგნოზი ჯერჯერობით უცნობია.

ამავდროულად, როგორც „ნიუპოსტისთვის“ გახდა ცნობილი, მძიმე ვითარებაა ოკუპირებულ ტერიტორიაზე. გალის საავადმყოფოში ე.წ. „ღორის გრიპის“ 11 შემთხვევა დაფიქსირდა, თუმცა შესაბამისი აპარატურისა და პირობების არქონის გამო, მოქალაქეების სათანადო მკურნალობა ვერ ხერხდება. ადგილობრივების განცხადებით, რუსი მესაზღვრეები მათ ე.წ. საზღვარზე არ უშვებენ, საუკეთესო შემთხვევაში კი ე.წ. საზღვრის გადასაკვეთად 300 ლარს ითხოვენ. მათი თქმით, ისინი წამლებს ხელზე ყიდულობენ, რომელთა ღირებულებაც ბევრად აღემატება ზუგდიდის აფთიაქებში არსებული მედიკამენტების ფასს.