მეშახტეების გაფიცვის მე-13 დღე - ტყიბულში დაძაბული ღამის შემდეგ სტაბილური ვითარებაა

საზოგადოება - 10:24, 26 Feb, 2016

1440

ტყიბულში, მინდელის სახელობის მაღაროს ადმინისტრაციულ შენობასთან ამ დროისთვის სიმშვიდეა. თუმცა მეშახტეები გაფიცვის და საპროტესტო აქციებს დღესაც აგრძელებენ. მათი მოთხოვნები უცვლელი რჩება, ისინი ხელფასების 40%-ით გაზრდას და სამუშაო პირობების გაუმჯობესებას ითხოვენ. ისინი დღეს აქციის გამართვას უკვე მუნიციპალიტეტის გამგეობის შენობასთან გეგმავენ. გაფიცულები ასევე ითხოვენ მოლაპარაკებებში ხელისუფლების წარმომადგენლებიც ჩაერთონ. საქნახშირის ხელმძღვანელობა სამუშაო და უსაფრთხოების პირობების გაუმჯობესებაზე თანახმაა, თუმცა ხელფასების გაზრდის შესაძლებლობას ამ ეტაპზე გამორიცხავს.

შეგახსენებთ, რომ რამდენიმე საათის წინ საქნახშირის შენობაში გაფიცული მეშახტეები შეიჭრნენ. ისინი ადმინისტრაციაში ფანჯრიდან შევიდნენ. კომპანიამ მალევე განცხადება გაავრცელა და დაადასტურა, რომ მეშახტეებმა შენობა დაარბიეს. ადგილზე მობილიზებული იყვნენ სამართალდამცავებიც. აქციის მონაწილეებმა შენობა უკვე დატოვეს და პროტესტს გარე პერიმეტრზე განაგრძობენ.

გაფიცულ მაღაროელებსა და დამსაქმებელ კომპანიას შორის შუამავლის ფუნქციას ჯანდაცვის სამინისტრო ასრულებს. უწყების წარმომადგენლის ინფორმაციით, მოლაპარაკებების პროცესი დაწყებულია. მისი განმარტებით, კომპანიამ გაფიცულებს ახალი სახელფასო მოდელი წარუდგინა და მათ უსაფრთხოების ნორმების გამკაცრებასაც დაპირდა. ელზა ჯგერენაიას ინფორმაციით, გაფიცულების საინიციატივო ჯგუფი შეთავაზებით კმაყოფილია.