გაფიცულ მაღაროელებს საქართველოს ინდუსტრიული ჯგუფი მოლაპარაკებებს სთავაზობს. კომპანია „საქ. ნახშირი“ ამ ეტაპზე მაღაროელებისთვის ხელფასის გაზრდის შესაძლებლობას გამორიცხავს, თუმცა მზადყოფნას გამოთქვამს სამუშაო პირობების გაუმჯობესებაზე იმუშაოს.

“ჩვენ ყველა პასუხისმგებლობას ვიზიარებთ, ჩვენ ვცდილობთ დღეს არსებული სტატუსი შევნარჩუნოთ, მიუხედავად გართულებული ეკონომიკური ფონისა და ამავდროულად ვიფიქროთ განვითარებაზე. ამაში ვხედავთ გამოსავალს. 40 %-ანი ზრდა ნიშნავს, რომ 60-65% იქნება თვითღირებულებაში ხელფასების წილი, ანუ ჩვენ იდეაში საერთოდ ეკონომიკურ შინაარს მოვკლავთ ამ წარმოების. ეს მოთხოვნა არის აბსოლუტურად დაუსაბუთებელი და ვერანაირად ვერ დაკმაყოფილდება ", - განაცხადა ჰოლდინგ საქართველოს ინდუსტრიული ჯგუფის ფინანსურმა დირექტორმა ზურაბ გელენიძემ.

სამართლებრივ საკითხებში ჰოლდინგ საქართველოს ინდუსტრიული ჯგუფის მრჩეველის ზვიად კორძაძის თქმით, გაფიცულებმა სხვისი საკუთრების ხელყოფისგან და დაზიანებისან თავი უნდა შეიკავონ რადგან ამას კონკრეტული სამართლებრივი რეაგირება მოჰყვება და ეს კავშირში არ იქნება გაფიცვასთნ.

"დესტაბილიზაციაზე, ესკალაციაზე, საკუთრების ხელყოფაზე ლაპარაკს უნდა დავანებოთ თავი იმიტომ, რომ ასეთ შემთხვევაში ამას მოჰყვება კონკრეტული სამართლებრივი რეაგირება, რაც არავითარ კავშირში არ იქნება გაფიცვასთნ იმიტომ, რომ შენობაში შეჭრა და ქონების დაზიანება არ არის გაფიცვა" - აღნიშნა ზვიად კორძაძემ.