ცნობილ როკმუსიკოსს ბაჩი ქიტიაშვილს საზოგადოების დახმარება ესაჭიროება

საზოგადოება - 13:08, 24 Feb, 2016

2818

ცნობილ ქართველ როკმუსიკოსს ბაჩი ქიტიაშვილს ჯანმრთელობის მძიმე მდგომარეობის გამო საზოგადოების დახმარება ესაჭიროება. ჯგუფ „ბერმუხას“ მუსიკოსს სიმსივნე აღმოაჩნდა, მის ოჯახს კი სათანადო გამოკვლევების და მკურნალობისთვის ფინანსური შესაძლებლობა არ გააჩნია. ინფორმაციას ამის შესახებ ფეიბუკზე წამყვანი ზაალ წულუკიძე ავრცელებს და საზოგადოებას ლეგენდარული მუსიკოსის დახმარებისკენ მოუწოდებს:

„ცნობილ ქართველ როკ მუსიკოსს, გიტარისტს, ქართული როკის ლეგენდას ბაჩი ქიტიაშვილს დაუდგინდა ფილტვების კიბო. ის ამჟამად იმყოფება არამიანცის საავადმყოფოს უკან საპატრიარქოს კლინიკაში თერაპიულ განყოფილებაში. მდგომარეობა ძალიან მძიმეა, ბაჩის ოჯახის სოციალური მდგომარეობა არ აძლევს საშუალებას რომ სათანადო და მაღალი დონის გამოკვლევა ჩაუტარდეს! გაავრცელეთ გთხოვთ და დავეხმაროთ ბაჩის და მის ოჯახს“- წერს ზაალ წულუკიძე.

როგორც მუსიკალური მიმომხილველი ლაშა გაბუნია ჟურნალი „თბილისი Out“-ის 2012 წლის გამოცემაში წერს:

"ბაჩი ქიტიაშვილი ერთ-ერთი პირველი ქართველი მუსიკოსია, რომელმაც ჯერ კიდევ საბჭოთა წყობისას მოახერხა აკრძალული როკმუსიკის დაკვრა. მისი ბენდი „ბერმუხა“ 1965 წლიდან არსებობს და დღემდე პოპულარობით სარგებლობს. ჯგუფი საკმაოდ მძიმე რიტმ-ენდ-ბლუზს, პროგრესივ, ჯაზ და ჰარდ როკს ასრულებს. „ბერმუხა“ თავის დროზე ერთადერთი დამოუკიდებელი მუსიკალური ჯგუფი იყო, რომელიც მაშინდელი საბჭოთა რეჟიმის იდეოლოგიას უპირისპირდებოდა, როგორც მუსიკით, ისე ცხოვრების წესით. გიტარისტ ბაჩი ქიტიაშვილს მიაჩნია, რომ ის და მისი ჯგუფის წევრები დისიდენტები იყვნენ. კომუნისტი იდეოლოგები მათზე ამბობდნენ: აი, ესენი აფუჭებენ და რყვნიან ახალგაზრდებსო. მუსიკოსი აღნიშნავს, რომ გასული საუკუნის 80-იანი წლების ე.წ. „პერესტროიკამდე“ ჯგუფი იატაკქვეშეთში იმყოფებოდა.

ბაჩი ქიტიაშვილმა ჩემთან საუბრისას გაიხსენა: „12 წლის განმავლობაში „ბერმუხა“ ზენიტში იყო, სცენიდან ფეხი არ ჩამოგვიდგამს. ვმოგზაურობდით ქალაქიდან ქალაქში, სოფლიდან სოფელში. ვიყავით მოსკოვში, სოჭში, კიევში, ხარკოვში და სხვა ქალაქებში. მართალი გითხრათ, მიკვირს, რომ დღესაც ამდენი ახალგაზრდა გვისმენს... „ბერმუხა“ ის ჯგუფია, რომლის კონცერტის დროსაც ქუთაისში გზები გადაკეტეს, იმდენი ხალხი იყო. ფოთში გამოსვლისას კი კედელი გადავანგრიეთ, თუმცა ხალხის თხოვნით, კონცერტი გავაგრძელეთ. რამდენიმე ქართული ნაწარმოები, რომელსაც დღესაც ვასრულებთ, სწორედ მაშინდელია“. „ბერმუხას“ რამდენიმე გამორჩეულად ცნობილი ჰიტი აქვს – „არწივი“ და „დღეს ჩვენ ერთად ვართ“, ისინი ყველა კონცერტზე სრულდება."